Elordada qansha «Sergek» kamerasy bar
Elorda ákiminiń orynbasary Malıka Bekturovanyń aıtýyna qaraǵanda, 2018 jyly qalanyń qoǵamdyq oryndarynda 14 myńnan astam quqyqbuzýshylyq jasalsa, 2019 jyly bul kórsetkish 8 myńǵa deıin tómendegen. Onyń ishinde, qala kóshelerinde jasalǵan qylmystar 38,4 paıyzǵa azaıǵan. Buzaqylyq áreketter sany 52,3 paıyzǵa tómendegen.
«Búgingi tańda astanada «Sergek» qoǵamdyq jáne jol qaýipsizdigi jobasy boıynsha 13 myń kamera ornatyldy. Onyń ishinde 10 myńy qaladaǵy qoǵamdyq tártipti qadaǵalaıdy. Bul kameralardyń derekteri kóshelerde bolyp jatqan jaǵdaıdy polıtsııa qyzmetkerleri baqylaıtyn Ahýal ortalyǵyna beriledi. Jol qıylystarynda jáne joldyń jelilik ýchaskelerinde ornatylǵan apparattyq-baǵdarlamalyq keshenderdiń quramyna kiretin sholý kameralary da elordada qoǵamdyq qaýipsizdikti baqylaýǵa múmkindik beredi», - dep jazady Malıka Bekturova Telegram-paraqshasynda.
Kameralar qalanyń túpkir aýdandarynda, mektepterdiń janynda, qoǵamdyq oryndarda ornalasqan. Sondaı-aq, mektepterde, balabaqshalarda, qoǵamdyq oryndar aýmaǵynda astanadaǵy qaýipsizdiktiń deńgeıin arttyrý maqsatynda menshikti kameralardy ıntegratsııalaý jumystary júrgizilip jatyr.