Elordada kanoe men baıdarkada eskek esýden qalalyq birinshilik ótip jatyr
ASTANA. KAZINFORM – Astanadaǵy «Tolqyn» sport kesheninde 2009-2013 jyly dúnıege kelgen jasóspirimder arasynda qalalyq chempıonat ótip jatyr, dep habarlaıdy elorda ákimdiginiń resmı saıty.
Jazǵy Olımpıada oıyndarynda 16 júlde jıyntyǵy úlestiriletin kanoe men baıdarkada eskek esý sporty Astana qalasynda 2000 jyldan beri qolǵa alynyp, turaqty túrde jolǵa qoıylǵan. Búgingi jarysqa qatysýshylardyń deni osy sportqa 1-2 aı ishinde ǵana kelip, alǵash ret sý betinde synǵa tústi.
– Mektepterdi aralap, kanoe men baıdarkada eskek esý sportymen aınalysýǵa shaqyramyz. Bul jerde sektsııaǵa qosylý úshin, 10 jastan asqan balalar júgirý, kermege tartylý, keýdeni jerden kóterý syndy normatıvterdi tapsyrý qajet. Sondaı-aq júze alýy da tıis. Sportty jańadan bastaǵandar 1-2 aı boıy daıyndyqtan keıin ǵana sýda júzedi. Sebebi olar kanoe men baıdarkada tepe-teńdikti saqtaýdy úırenýi kerek, - dedi Astana qalasynyń aǵa bapkeri Sergeı Shımın.
Buǵan deıin «Tolqyn» sport kesheniniń janyndaǵy eskek esý kanalyna jumystar júrgizilip, 2025 jyly qaıta qoldanysqa berildi. Qazirgi kezde bul jerde sportty endi bastaǵandar jattyqsa, tájirıbeli sportshylar Esil ózeninde biliktilikterin shyńdaıdy.
Jarys barysynda qatysýshylar 200 metr men 500 metr qashyqtyqty belgili bir ýaqytta júzip ótýi kerek. Normatıvti oryndaı almaǵan qatysýshylarǵa taǵy 1 aıdaı synaq ýaqyty beriledi.
Aıta keteıik, jarys jeńimpazdary aldaǵy ýaqytta Almaty jáne Temirtaý qalasynda ótetin respýblıkalyq deńgeıdegi jarystarǵa qatysýǵa múmkindik alady.