Elordada qańǵybas ıtter men mysyqtarǵa kastratsııa jasalýda
NUR-SULTAN. QazAqparat – Elordalyqtar ózderiniń úı janýarlaryna tegin túrde kastratsııa jáne zararsyzdandyrý jasata alady, dep habarlaıdy QazAqparat tilshisi.
«Qalada qańǵybas ıtter pen mysyqtardyń paıda bolýy men kóbeıýiniń birneshe sebebi bar. Aldymen ıeleriniń ózderi bosatyp jiberedi. Ekinshi sebep, qala mańyndaǵy eldi mekenderden aýyp keledi. Sondyqtan kún sanap dalada qalǵan ıt-mysyqtardyń sany artýda. Osyǵan baılanysty bul másele qalalyq ákimdiktiń nazarynda. Aýyl sharýashylyǵy mınıstrliginiń buıryǵyna sáıkes, qańǵybas ıt-mysyqtardyń sanyn azaıtýdyń bir tásili ol kastratsııa jasaý. Bul tásil elordada sońǵy úsh jyldan beri turaqty qoldanylyp keledi», - dedi Qalalyq orta sapasy jáne baqylaý basqarmasy Veterınarııa jáne ósimdikterdi qorǵaý bóliminiń bas mamany Ásem Mýsına.
Onyń aıtýynsha, 2017 jyly elordada ıesiz qalǵan 4 myń ıt pen mysyqqa kastratsııa jasalsa, ótken jyly - 500, al bıyl 1800 janýarǵa atalmysh ádisti qoldaný josparlanǵan.
«Aǵymdaǵy jyldyń 1 tamyzynan bastap astanalyqtardyń óz janýarlaryn tegin kastratsııalaý jáne zararsyzdandyrý múmkindikteri bar. Taǵy bir aıtyp ótetin jaıt, biz júrgizgen monıtorıngke sáıkes qala boıynsha qańǵybas ıtter men mysyqtardyń bazar jáne saýda úıleriniń mańaıyn mekendeýi jıi kezdesedi. Oǵan sebep, ol jerlerden tamaq qaldyqtyrynyń kóptep shyǵýy. Degenmen bizdiń veterenar mamandar belgili bir ýaqyt saıyn atalǵan mekenderge reıd ke shyǵady. Eger ıesiz qańǵyp júrgen ıt nemese mysyq anyqtalǵan jaǵdaıda ol birden tirkeýge alynady», - dedi ol.
Basqarma ókiliniń málimetinshe, búginde qaladaǵy qańǵybas ıt pen mysyqtardyń sanyna qatysty statıstıka joq. Oǵan sebep atalǵan janýarlardyń bir aýdannan ekinshi aýdanǵa kóship-qonyp júrýi.
«Degenmen, bizde kóshe janýarlarynyń jasaqtalǵan biryńǵaı bazasy bar. Onda qańǵybas ıtter men mysyqtardyń derekkózi bar jáne olarǵa arnaıy chıp qoıylady. Bıyl jyl basynan beri 6 myń ıtke chıp qoıyldy. Sondaı-aq, árbir janýardyń veterınarlyq pasporty bar», - dedi ol.
Elordalyqtar úı janýarlaryn uryqsyzdandyrý jáne zararsyzdandyrýǵa qatysty Meńdeshev, 51 mekenjaıy boıynsha nemese 87086852476 uıaly telefony arqyly tolyq aqparat ala alady.
Eske sala ketsek, buǵan deıin elordada ıesiz qalǵan ıtter men mysyqtardyń jármeńkesi ótkeni týraly habarlaǵan bolatynbyz.
