Elordada qańǵybas ıtter kóbeıgen

«Ózimizdi qoıshy, balalar úshin alańdaımyz», - deıdi ata-analar.

Kezbe ıttiń kesirinen kóshe aınalyp úıine áreń kiretin bastaýysh synyp oqýshylary taǵy bar.

Jergilikti turǵyndardy alańdatatyn basty másele - aýrýdyń taralýy. Sebebi bul mańdaǵy ıtter toıǵan jerine úırengen. Eshkimdi jatyrqap, jatsynbaıdy. Balalar da qolyndaǵy baryn berip, olarmen dostasqan. «Alaıda at teppeıdi, ıt qappaıdy deme» degen sóz bar qazaqta. Osydan saqtanǵan turǵyndar qaýipsizdik úshin bir shara qabyldaý kerek dep sanaıdy.

«Iesi bar ma, joq pa ony biz bilmeımiz. Burynǵy kezde onsha bilinbeıtin. Bir-eki jyldyń ishinde ıtter kóbeıip ketti. Keshke shyǵý qıyn», - dep atap ótti qala turǵyny Jumakúl Erekeshova.

Olar kóktem men kúzde kóbeıedi. Buralqy ıtti aýlap, joıýǵa «Astana vetservıs» mamandary jaýapty. Máseleniń bar ekenin ózderi de moıyndap otyr. Olarǵa táýligine qańǵybas ıt qaptap ketti degen mátindegi 50 shaqty shaǵym túsedi. Byltyr ıesiz kezip júrgen 3 myńdaı ıtti ustaǵan. Al bıylǵy úsh aıda myńǵa jýyǵyn aýlapty. Degenmen olardy ustap qamaýmen másele sheshilmeıdi deıdi. Sondyqtan sterılızatsııalaýdy usynyp otyr.

«Bıyl 4 myń ıt, mysyqqa kastratsııa jasaımyz dep josparlap otyrmyz. Aldyńǵy jyldary mundaı ádisti qoldanbaıtynbyz. Úı janýarynyń kóbeıýin tejeýdiń jalǵyz tıimdi joly osy. Ekonomıkalyq turǵydan da paıdaly. Olar kóbeımese, bizdiń shyǵyndarymyz azaıady. Kastratsııa jasaýǵa qajetti qural-jabdyq alyndy. Mamandarymyz da jeterlik», - dedi «Astana vetservıs» KMK bólim basshysy Alpyspaı Jumaev.

Qańǵybas ıtterdi azaıtýdyń taǵy bir joly - olarǵa ýaqytsha pana tabý. Bizde buǵan mán berip jatqandar az. Janýarǵa jany ashıtyn eriktiler bar. Biraq olar qańǵyp qalǵan ıtterdi qamqorlyǵyna alatyn ortalyqty óz betinshe asha almaıdy. Sebebi zańda qarastyrylmaǵan. Sondyqtan sarapshylar bul máseleni sheshýge keshendi túrde kirisý kerek dep sanaıdy.

«Úı janýaryn asyraǵysy keletinderge jaýapkershilik júkteý kerek. Máselen Eýropa elderinde ıt ne mysyq asyraıtyn bolsań arnaıy ruqsat qaǵaz alasyń. Onyń ekpelerin saldyryp, baǵyp qaǵýǵa mindettisiń. Kóshede qańǵyrtyp jibere almaısyń, Al bizde eshqandaı jaýapkershilik júktelmeıdi. Qalasań asyraısyń, qalamasań qýyp shyǵasyń. Muny zań júzinde retteý qajet. Iesiz qalǵan janýarlarǵa qamqorlyq kórsetetin arnaıy ortalyq ashý kerek», - dedi veterınarlyq klınıkanyń bas dárigeri Tatıana Kropıvnıtskaıa.

Osyndaı ortalyq astanada bıyl paıdalanýǵa beriledi degen jospar bar. Onyń qurylysyna bıýdjetten 675 mıllıon teńge bólingen. Nysan 500 qańǵyp júrgen úı janýaryna pana bolady.

Sarapshylardyń aıtýynsha, ortalyqty jumys jaǵdaıynda ustap otyrý úshin aıyna 2 mıllıon teńge qajet.