Elordada qalamgerler alleıasy ashylady
NUR-SULTAN. QazAqparat – Elordadaǵy Abaı kóshesiniń boıynda qalamgerler alleıasy ashylady. QR Premer-Mınıstriniń orynbasary Berdibek Saparbaev zııaly qaýym ókilderimen kezdesýinde osyndaı jaǵymdy jańalyqty jetkizdi.
«Azııa qalamgerleriniń forýmyna elge belgili aqyn-jazýshylarymyzdyń barlyǵy qatysyp jatqanyn paıdalanyp, ózderińizben eldik máseleler boıynsha pikir almassaq dep kezdesip otyrmyz. Forýmǵa memleket basshysynyń ózi qatysyp, qurlyq jazýshylarynyń arasynda «Azııa alyby» atty ádebı syılyqty taǵaıyndaý jóninde, Azııa qalamgerleriniń ortaq kitaphanasyn ashý týraly usynystar aıtty. Ony sizder de qoldaıdy dep oılaımyz», - dep bastaǵan Vıtse-Premer elorda tórinen qalamgerler alleıasy ashylatynyn aıtty.
«Nur-Sultan qalasynda jazýshylar odaǵynyń ortalyq fılıalyn ashý josparlanyp otyr. Qazir halyq pen bılik arasyndaǵy dıalogqa kóp kóńil bólinip otyr. Kıno týraly zań qabyldanǵanyn bilesizder. Taǵy bir másele – qazaq ádebıetiniń jaýharlaryn basqa tilderge aýdarý. Ulttyq aýdarma bıýrosynyń jumys istep turǵanynan habardar shyǵarsyzdar. Qazaq qalamgerleriniń shyǵarmalary BUU-nyń tiline aýdarylatynyn da estip otyrsyzdar. Áleýmettik jeliden kórip otyrsyzdar. Qazir bárimizdi tolǵandyryp júrgen eń úlken másele – ulttyq qundylyqtarymyz, tárbıe, otbasy máselesi. Sońǵy kezde kóp kóterilip júrgen másele – eńbekke baýlý. Bárimizdi áke-sheshemiz eńbekke tárbıeledi. Masyldyq degen beleń alyp bara jatqan sııaqty. Masyldyq pen muqtajdyqty ajyrata bilýimiz kerek. Osy turǵyda aıtar oılaryńyz bolsa, eskerilsin dep Aqparat jáne qoǵamdyq damý mınıstrin, Bilim jáne ǵylym mınıstrin, Mádenıet jáne sport mınıstriniń orynbasaryn aldaryńyzǵa alyp keldik», - dedi Berdibek Saparbaev.
Atalmysh kezdesý aıasynda shyǵarmashyl zııaly qaýymnyń Qazaqstan Respýblıkasy Prezıdenti Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty halyqqa joldaýyn iske asyrýdaǵy róli taqyryby talqylandy.
Memleket jáne qoǵam qaıratkeri Myrzataı Joldasbekov, Qazaqstan Jazýshylar Odaǵy basqarmasynyń tóraǵasy Ulyqbek Esdáýlet, tiltanýshy, Qazaqstannyń Eńbek Eri Oljas Súleımenov, jazýshy dramatýrg Dýlat Isabekov, Qazaqstannyń eńbek sińirgen qaıratkeri Tólen Ábdik, «Qurmet» ordeniniń ıegeri Beksultan Nurjekeev, aqyn Aqushtap Baqtygereeva, aqyn Esenǵalı Raýshanov pen Tynyshtyqbek Ábdikákimuly sııaqty tanymal ádebıet ókilderi qatysty. Kezdesýde zııaly qaýym ókilderi eldiń áleýmettik ahýaly men saıası reformalar týraly sóz qozǵady.
