Elordada «Qalalyq delfıı oıyndary» ótti
ASTANA. 15 maýsym. QazAqparat - Elordada keshe Astananyń 15 jyldyq mereıtoıyna oraılastyrylǵan «Qalalyq delfıı oıyndary - Astana 2013» tabysty aıaqtaldy.
«Birinshi oryn úshin júzdegen jas stýdent jigitter men qyzdar kúni boıy saıysty. Oıyn 10.00-de bastalyp, odan keıin qatysýshylarǵa jerebe tastaldy. Baıqaý eki jerde: Mektep oqýshylar saraıynda, sol ǵımarattaǵy kontsert zalynda ótti», - dep habarlaıdy astana.kz saıty.
Bıylǵy jyly qalalyq oıyndarda S.Seıfýllın atyndaǵy Qazaq agro ýnıversıteti, Astananyń Gýmanıtarlyq jáne polıtehnıkalyq kolledjder stýdentteri, №65, 64, 53, 15 orta mektep jáne №1 lıtseı oqýshylary, QazUÓÝ ýnıversıteti men kolledj stýdentteri óner kórsetti.
Oıyndar eki jas ereksheliginde: kishi top - 10-15 jas, eresek top - 16-21 jas aralyǵynda ótti.
Baıqaýǵa qatysýshylar 11 atalymda saıysty. Olar: «fortepıano», «skrıpka», «baıan, akkordeon», «dombyra», «qobyz», «dástúrli ánshilik», «estrada áni», «akademııalyq án», «ulttyq bı», «qazirgi zamanǵy bı», «beıneleý óneri» jáne «fotografııa». «Akademııalyq án» atalymyna qatysýshylar eki bólek jas ereksheligi boıynsha: kishi (16-20) jáne eresek (20-21) jas aralyǵynda uıymdastyryldy.
Delfıı oıyndary - klassıkadan bastap qazirgi janrdaǵy barlyq óner túrlerin biriktiretin jarys túriniń biri. Bul álemniń túrli mádenıeti men talantty adamdarynyń basyn qosyp, ózderin-ózderi damytýǵa shıryqtyrýǵa múmkindik beretin eń bedeldi is-shara bolyp sanalady.
