Elordada qala ishindegi temir garajdar alynyp tastalady
ASTANA. QazAqparat - Elordada aýlalardaǵy metall garajdardy alyp ketý bastaldy. Bul jaıly Saryarqa aýdanynyń ákimi Arman Turlybek Feısbýktegi paraqshasynda málimdedi.
«Aýlalardaǵy temir garajdardy alyp tastap jatyrmyz, olardyń ıeleri balalar alańqaılary jáne qoǵamdyq oryndardy zańsyz ıelenip alǵan», - deıdi A. Turlybek.
Budan tys, aýdan ákimi turǵyndardy jarnama ornalastyrý erejelerin saqtaýǵa jáne jeke sektorda qurylys qoqystaryn tastamaýǵa shaqyrdy.
«Zań talaby bar, ereje bar! Jarnamany sáýletke saı etip ornalastyryńyzdar! Al jeke sektordyń turǵyndary, ótinish, qurylys materıaldaryn kópshilik orynǵa emes óz aýlańyzǵa jınańyzdar! Qalamyzdaǵy tazalyq ózimizden bastalady», - dedi aýdan ákimi.
Foto: domoscope.com
