Elordada qala ákimi men Qazaqstan Prezıdentiniń Jańajyldyq shyrshalaryna 500-ge jýyq bala qatysady
ASTANA. 22 jeltoqsan. QazAqparat /Gúlmıra Álıakparova/ - Elordanyń daryndy jáne ata-ananyń qamqorlyǵynsyz qalǵan 500-ge jýyq balasy qala ákimi men Qazaqstan Prezıdentiniń Jańajyldyq shyrshalaryna qatysady.
Bul týraly qalalyq Bilim basqarmasynan málim etti.
Ata-ananyń aıaýly alaqanynan aıyrylǵan balalar úshin QR Prezıdentiniń Jańajyldyq shyrshasy elordada 24 jeltoqsan kúni «Dýman» oıyn-saýyq kesheninde ótedi. Oǵan «SOS» qalashyǵynan, kámeletke tolmaǵandarǵa arnalǵan jetimhanadan, balalar úıleri men orta mektepterden 9-13 jas aralyǵyndaǵy barlyǵy 150 bala qatysady.
Eske salaıyq, 2009 jylǵa deıin «prezıdenttik shyrshalar» Elbasynyń tikeleı óziniń qatysýymen Almatyda nemese Astanada uıymdastyrylyp keldi. Al byltyrdan bastap jańa dástúr qalyptasty. Merekelik is-shara barlyq óńirlerde (ár oblysta 150 baladan) bir kúnde, bir ýaqytta uıymdastyrylady da, Memleket basshysy N.Nazarbaev balalardy beınejeli arqyly quttyqtaıdy.
Merekelik baǵdarlama ádettegideı, áserli teatrlandyrylǵan qoıylymdarǵa, oıyndar jáne án men bıge toly bolady. Shyrshaǵa qatysqan ár bala Aıaz ata men Aqshaqardan syılyqqa noýtbýk, jumsaq oıynshyqtar men «táttige» toly qaltalar alady.
Sondaı-aq elordada 25 jeltoqsan kúni M.Ótesimuly atyndaǵy Oqýshylar saraıynda Astana ákiminiń atynan jetim jáne daryndy balalarǵa arnalǵan jańajyldyq keshter ótedi. Oǵan qatysatyn 300 balaǵa elektrondy saǵattar men «táttiler» tartý etilmek.
