Elordada kafe, barlar karantın kezinde túnde qonaq kútip, kalıan satqan
NUR-SULTAN. QazAqparat – Elordada qatań karantın engizilgenine qaramastan tártip buzyp, qoǵamǵa qaýip tóndirip otyrǵan nysandar sany az bolmaı shyqty. Olardyń arasynda tipti bir ret eskertý jasalǵanymen zańsyz áreketke qaıta jalǵastyrǵandar da tabylyp jatyr.
Nur-Sultan qalalyq Polıtsııa departamentiniń ókilderi arnaıy júrgizgen tekserý barysynda osyndaı kóptegen jáıtterdi anyqtaǵan. Baspasóz qyzmetiniń málimetterine qaraǵanda, karantın talaptaryn buzǵan nysandar arasynda monsha, kafe-barlar, tehnıkalyq qyzmet kórsetý stantsııalary bolǵan.
«Budan bólek, kelýshilerge kalıan usynatyn oıyn-saýyq oryndary anyqtaldy. 7 shildeden bastap Qazaqstanda meıramhanalarda, kafelerde jáne basqa da qoǵamdyq mekemelerde kalıan shegýge tyıym salatyn zań kúshine endi. Endi kalıandy tek úıde ǵana shegýge bolady. Qaladaǵy «Shıshka» laýndj-barynda mekeme basqarýshysy klıentterge kalıan usynyp, bardyń qyzmetkeri men qonaqtaryna qatysty QR ÁQBK 441-baby boıynsha ákimshilik hattama toltyryldy. Tekserý kezinde bólmede 30-dan astam klıent bolǵan. Atalǵan nysannyń karantın rejımin birneshe ret buzǵany anyqtaldy. Sondaı-aq 13 tamyzda «Almaty» aýdanynyń jedel toby «Prıanık» meıramhanasynda túngi ýaqytta karantın rejıminiń buzylǵanyn jáne kalıan shegý faktisi oryn alǵanyn anyqtady. Mekeme ıesine qatysty QR ÁQBK 441-baby 3-bóligi boıynsha ákimshilik is qozǵaldy»,-delingen habarlamada.
Sondaı-aq onda temeki ónimderin, onyń ishinde qyzdyrylatyn temeki men kalıan tutynatyn adamdarǵa shara qoldanbaǵany úshin ıesine 25-ten 60 AEK-ke deıin aıyppul salynady. Kún saıyn quramyna ákimdik, taýarlar men qyzmetterdiń sapasy men qaýipsizdigin baqylaý basqarmasynyń, Almaty aýdanynyń jergilikti polıtsııa qyzmetiniń qyzmetkerleri kiretin jedel top kásipkerlik nysandary boıynsha reıdter júrgizedi.
«Olar 14 tamyz kúni saǵat 22:00-den 01:00 aralyǵynda shaǵyn jáne orta bıznestiń 6 nysanynda karantın sharalarynyń buzylǵanyn anyqtady. Atap aıtqanda, «Carlife» tehnıkalyq qyzmet kórsetý stantsııasy, «Ofıtserskıı» syra bary, «Baramysh» pavılony, «Hottabych» saýnasy, «Prıanık» meıramhanasy jáne «Shıshka» laýndj-bary karantın rejımin buza otyryp jumys istegen. Barlyq jınalǵan materıaldar QR ÁQBK 425-baby boıynsha protsessýaldyq sheshim qabyldaý jáne jaýapqa tartý maqsatynda Taýarlar men kórsetiletin qyzmetterdiń sapasy men qaýipsizdigin baqylaý departamentine jiberildi»,-dep habarlady baspasóz qyzmeti.
