Elordada qabyldanatyn zań jobalarynyń áleýmettik-ekonomıkalyq nátıjesin baǵalaý máselesi talqylanady
ASTANA. 10 qarasha. QazAqparat - Aǵymdaǵy jylǵy 12 qarashada Astanada Qazaqstanda qabyldanatyn zań jobalarynyń áleýmettik-ekonomıkalyq nátıjesin baǵalaý jáne ǵylymı ekonomıkalyq saraptaý máselesine arnalǵan dóńgelek ústel uıymdastyrylmaq.
Ekonomıkalyq damý jáne saýda mınıstrliginiń málimetinshe, atalǵan basqosýǵa QR Parlamentiniń depýtattary, Prezıdent Ákimshiliginiń ókilderi, ortalyq memlekettik organdardyń basshylary, saıası partııalardyń ókilderi, jeke kásipkerlik sýbektilerdiń, qoǵamdyq jáne halyqaralyq uıymdardyń, ǵylymı mekemelerdiń birlestikteri, sonymen qatar Qazaqstannyń jetekshi sarapshylary men ǵalymdary qatysady dep kútilýde.
Dóńgelek ústel jumysynyń barysynda qabyldanatyn zań jobalardyń áleýmettik-ekonomıkalyq nátıjesine baǵalaý jasalady, sondaı-aq zań jobalardy ǵylymı-ekonomıkalyq túrde saraptaý máseleleri talqylanady. Búginde Qazaqstanda zań jobalary boıynsha ǵylymı quqyqtyq, jemqorlyqqa qarsy, krımınologııalyq saraptamalar, halyqaralyq sharttarǵa sáıkestiligi turǵysynda saraptama júrgiziledi. «Zań jobalaryna ǵylymı ekonomıkalyq saraptamany engizý sheshimi qabyldaǵan kezde ázirlengen zań jobalarynyń maqsattylyǵyn, tıimdiligin, árekettiligin tekserýde júıelik ádis qamtamasyz etiledi», - delingen taratylǵan habarlamada.
