Elordada izdeýde júrgen 12 qylmysker ustaldy
NUR-SULTAN. QazAqparat - Jeltoqsannyń 11-13 kúnderi elorda aýmaǵynda krımınogendik ahýaldy turaqtandyrýǵa baǵyttalǵan jedel aldyn alý is-sharasy ótti, dep habarlaıdy QazAqparat tilshisi.
Nur-Sultan qalalyq Polıtsııa departamentiniń málimetinshe, osy kúnderi 82 qylmys tirkelip, onyń 66-sy áshkerelendi. Sonymen qatar buryn jasalǵan 36 qylmys ashylyp, izdeýde júrgen 12 qylmysker men zańsyz júrgen 37 adam ustaldy. Tyıym salynǵan zattardy zańsyz saqtaǵan nemese alyp júrgen 23 adam qolǵa tústi.
«Baıqońyr» aýdandyq polıtsııasy jedel izdestirý is-sharasy barysynda alaıaqtyq jasaý kúdigine ilingen 21 jastaǵy qyzdy ustady. Ol saýda úıindegi shaǵyn dúkende kámelettik jasqa tolmaǵan jasóspirimniń quny 120 myń teńgelik «OPPO» uıaly telefonyn aldap alyp ketken. Kúdikti jasóspirimnen telefonyn qońyraý shalýǵa surap alyp, belgisiz baǵytta boı tasalaǵan. Odan keıin telefondy satyp jiberip, túsken aqshany óz qajetine jumsaǵan. Atalǵan fakti boıynsha sotqa deıingi tergeý amaldary júrgizilip jatyr«, - dedi departamentten.
Sonymen qatar vedomstvo málimetinshe, reıd barysynda túrli ákimshilik quqyq buzýshylyq jasaǵan 2,5 myńǵa jýyq adam jaýapkershilikke tartyldy. Onyń ishinde otbasylyq janjal shyǵarǵan 37 azamat, mindetin oryndamaǵan 12 ata-ana, kishigirim buzaqylyq jasaǵan 216, tynyshtyq buzǵan 283 adam bar. Qoǵamdyq orynda ishimdik iship, mas kúde júrgen 400-ge jýyq adam jaýapqa tartyldy. Sonymen qatar kólik quralyn mas kúıde aıdaǵan 28 júrgizýshi ustaldy.
