Elordada IYU-nyń Ǵylym jáne tehnologııalar jónindegi birinshi sammıti ótedi
Bul jaıynda búgin QR Parlamenti Senatynyń jalpy otyrysynda belgili boldy, dep habarlaıdy QazAqparat.
Palatanyń jalpy otyrysynda «Islam konferentsııasy uıymyna múshe elder arasyndaǵy ekonomıkalyq, tehnıkalyq jáne saýda yntymaqtastyǵy týraly bas kelisimdi ratıfıkatsııalaý týraly» Qazaqstan Respýblıkasy Zańy jobasyn tanystyrǵan elimizdiń Ulttyq ekonomıka mınıstri Tımýr Súleımenovtiń aıtýynsha, Islam elderinde kapıtaldan basqa ozyq tehnologııalar da bar.
«Munaı eksporttaýshy elder qazirgi kezde atalǵan shıkizattyń ekportyna negizdelgen damý modelin ózgertýge tyrysýda. Olar aqparattyq-kommýnıkatsııalyq tehnologııalarǵa súıenetin ekonomıkanyń ozyq sektorlaryn qarjylandyrý arqyly ekonomıkalyq jańǵyrtý saıasatyn júrgizýde», - dedi ol.
Bul rette mınıstr Qazaqstan sarapshylar tartý, birlesken zertteýler júrgizý jáne bilim berý stıpendııalaryn alý arqyly tájirıbe jáne tehnıkalyq múmkindiktermen almasa alatyndyǵyn basa aıtty.
«2017 jylǵy 10-11 qyrkúıekte Astana qalasynda EKSPO-2017 Halyqaralyq kórmesiniń jabylýy kúnderi Islam yntymaqtastyǵy uıymy memleketteri basshylarynyń qatysýymen Uıymnyń Ǵylym jáne tehnologııalar jónindegi birinshi sammıtin ótkizý josparlanyp otyrǵanyn atap ótken jón», - dedi Tımýr Súleımenov.
Aıta keteıik, 1977 jyldan bastap Islam konferentsııasy uıymyna múshe elder arasyndaǵy ekonomıkalyq, tehnıkalyq jáne saýda yntymaqtastyǵy týraly bas kelisim múshe elderdiń ekonomıkalyq yntymaqtastyǵyn reglamentteıtin Uıymnyń basty negizdemelik qujaty sanalady. Kelisimge qosylý musylman elderimen tyǵyz áriptestik qatynastardy damytýǵa qarqyn beredi, ıslam qarjy jáne ekonomıka ınstıtýttarymen yntymaqtastyqty jandandyrady.
Jalpy otyrys barysynda «Islam konferentsııasy uıymyna múshe elder arasyndaǵy ekonomıkalyq, tehnıkalyq jáne saýda yntymaqtastyǵy týraly bas kelisimdi ratıfıkatsııalaý týraly» Qazaqstan Respýblıkasy Zańyna biraýyzdan daýys berilip, qabyldandy.
