Elordada ıtterdi serýendetetin jer joq - kınologtar keńesiniń ókili
ASTANA. QazAqparat - It ósiretin Astana turǵyndary qala bıliginen ıtterdi serýendetý men úıretýge arnalǵan jerdi bólý máselesinde kómek kórsetýde surady, dep habarlaıdy Astana ákimdigininiń medıa ortalyǵy .
Belsendilerdiń usynysy boıynsha, janýarlarǵa arnalǵan aýmaqty qorshap, úı janýarlarǵa sporttyq qımyldardy úıretetin sektsııany uıymdastyrýǵa bolady.
«Astanada ıtterdiń sany jyldan - jylǵa ósýde. Soǵan baılanysty, ıtter men mysyqtardy asyraý erejeleri jasaldy jáne bul erejelerdi saqtaý kerek. Degenmen, arnaıy erejeler shyǵarylsa da, ıtterdi serýendeýge shyǵaratyn jáne arnaıy qımyldardy úıretetin alańdar joq. Eger mundaı oryndar bólinbeıtin bolsa, mamandar bul ıtterdi úıretip, qoǵamǵa beıimdeı almaıdy. Al eger osy atalǵan alańdar uıymdastyrylatyn bolsa, onda úı janýarlaryn sporttyq sektsııalar ashýǵa bolar edi», - dedi Qazaqstannyń kınologtar keńesiniń ókili Aleksandr Belonenko.
Onyń aıtýynsha, búgingi kúni Astana qalasynyń ıt ósirýshiler klýbynda resmı túrde 1,5 myń ıt tirkelgeni. Alaıda tirkelmegen úı janýarlarynyń sany da kóp.
Úı janýarlaryna arnalǵan erejede «qalanyń ishinde ıtterdi qysqa qarǵybaýǵa baılap, tumyldyryq kıgizip serýendetý kerek» dep anyq jazylǵan. Serýendeý kezinde, janýar ıesi ıtiniń artyn jınap, mal dárigerlik kýáligin ózimen alyp júrý kerek. Úı janýarlarymen balalar alańynda, sporttyq alańdarda, mektepki deıingi balalar aýmaǵynda, tyıym salynǵan jerlerde serýendeýge bolmaıdy.
Itterdi qarǵybaýsyz jáne tumyldyryqsyz tek qorshalǵan jerlerde, úı janýarlaryn úıretýge arnalǵan oryndarda serýendetýge bolady. Alaıda, qalada áli kúnge deıin janýarlarǵa arnalǵan jerdi bólmegendikten, janýar ıesine aıyppul salmaı, birinshi ýaqytta eskertý ǵana beriledi.
«Astanalyqtardyń ózderi bul iske óz úlesin qosýǵa daıyn. Endi tek jerdi bólip, oǵan ıt asyraýshylardyń qarjysyn salý ǵana qaldy», - dedi A.Belonenko.
Onyń aıtýynsha, buryn qalada ıtterdi serýendetýge arnalǵan jer bolǵan, alaıda keıinirek ol qyzmetin toqtatyp, ornyna turǵyn úıler salynyp ketken.
«Astana basqa qalalarǵa úlgi bolýy tıis. Mysaly, Qaraǵandy qalasynda dál ortalyq saıabaqtyń ortasynda ıttergen arnalǵan oryn bar eken. Ol jer qorshalǵan jáne tolyqtaı qaýipsiz. Biz aqsha surap turǵan joqpyz. Bizge tek jer ǵana kerek jáne ol jerdi múmkindiginshe qorshaý kerek. Al ony qalyptastyrý jumystarynyń barlyǵyn klýbtar óz moınyna alady», - dedi Qazaqstannyń kınologtar keńesiniń ókili Aleksandr Belonenko.
