Elordada Ispanııa kompanııasy medıtsınalyq jabdyqtar shyǵaratyn óndiris ashady
«Fira de Barcelona» kórme kesheniniń bas dırektory K. Serraıong jáne bas atqarýshy dırektory R. Sapateromen kezdesý ótti. Bul kezdesý shilde aıynda Nur-Sultan qalasynda Eýroazııalyq aımaq elderi úshin «Aqyldy qalalar kongresin» ótkizýge baılanysty ótkizildi. R.Sapateronyń Qazaqstan astanasyna qańtar aıyndaǵy saparynyń jáne onyń ákimi A. Kólginovpen kelissózderiniń qorytyndysy shyǵaryldy, osydan keıingi is-qımyl algorıtmi anyqtaldy.
Jırona saýda palatasynyń basshylyǵymen Qazaqstannyń 2018 jáne 2019 jyldardaǵy bıznes-mıssııalarynyń qorytyndysy talqylanyp, olardyń negizinde qazirgi ýaqytta taraptar Katalonııa iskerlik toptary delegatsııasynyń maýsym aıynda Qazaqstanǵa saparyn daıyndaýda. Aýyl sharýashylyǵy, munaı-hımııa jáne týrıstik salalarda, sondaı-aq densaýlyq saqtaý sektorynda yntymaqtastyqty keńeıtýge basty nazar aýdarý kózdelýde. Bul máseleler birqatar ekijaqty kezdesýler barysynda egjeı-tegjeıli qaraldy.
Jırona áýejaıynyń jańa dırektory V. Paıares Pıkemen qazaqstandyq týroperatorlarmen jazǵy kezeńge charterlik reıstiń ashylýyn jáne Jerorta teńiziniń Kosta Brava jaǵalaýynda «all inclusive» júıesi boıynsha qonaq úılerde turýdy qamtıtyn qazaqstandyq týrısterge arnalǵan paketti birlesip ázirleý múmkindigi talqylandy. Jıronanyń yńǵaıly geografııalyq ornalasýyn (Barselona, Andorra jáne baskalarǵa jaqyn) eskere otyryp bul týrıstik marshrýt óte tartymdy baǵytqa aınalýy múmkin.
«Iberhospitex» katalonııalyq kompanııasynyń basshylyǵymen Qazaqstan elordasyna kezekti saparynyń qorytyndysy talqylandy, onyń qorytyndysy boıynsha 2020 jyldyń sońyna deıin Nur-Sultan qalasynda júrek-qan tamyrlary ınterventsııasy salasynda medıtsınalyq jabdyqtar men joǵary tehnologııalyq ónimder shyǵarý boıynsha jergilikti óndiris ashý josparlanýda.
Sapardyń mańyzdy quramdas bóligi Katalonııanyń Ulttyq kitaphanasyna barý jáne onyń kóp jyldyq dırektorymen Evgenııa Serramen kezdesý boldy. Elshi kitaphana qoryna ıspan tiline aýdarylǵan Qazaqstan Respýblıkasynyń Tuńǵysh Prezıdenti N. Á. Nazarbaevtyń «Táýelsizdik dáýiri» jáne «Qazaqstan joly» atty kitaptaryn, Qazaqstan prozasy men poezııasynyń antologııasyn, elimizdiń tarıhy men mádenıeti týraly kitaptardy tapsyrdy. Abaıdyń «Qara sózin» dırektorǵa tapsyryp Q. Jıgalov uly ǵalym, aqyn, oıshyl Abaıdyń 175 jyldyǵyn Qazaqstanda jáne shetelde atap ótý týraly áńgimeledi.
E. Serra kitaphana ǵımaratynyń birinshi tasy 1401 jyly qalanǵanyn, qazirgi ýaqytta onyń kitap qory tórt mıllıonnan astam danany quraıtyndyǵyn aıtty. «Katalonııa bas kitaphanasy tarıhta alǵash ret Qazaqstan týraly kitaptardy syıǵa aldy jáne buǵan baǵa jetpes syılyq», - dedi E. Serra.
Barselona tsıfrlandyrý men tıimdi basqarýdy engizý salasyndaǵy jetistikterimen keńinen álemde tanymal. Qalada jyl saıyn álemge áıgili Smart City Expo jáne Mobile World Congress forýmdary ótkiziledi. Kórmeden qala ekonomıkasyna jyl saıyn 2,6 mlrd eýrodan astam tabys túsedi.
