Elordada iskerlik aýdandar jobasy iske asyrylmaq
ASTANA. QazAqparat - Elordada iskerlik aýdandar jobasy iske asyrylmaq. Bul týraly «Astana Bas jospary» ǴZJI» JShS qalalyq kólik tobynyń bas mamany Aqmaral Temirova aıtty, dep habarlaıdy QazAqparat tilshisi.
«Biz kólik-aýystyryp otyrǵyzý toraptaryn qurýdy usynamyz. Olardy radıaldy baǵyttardyń qıylysynda usynyp otyrmyz. Máselen, mundaı kólik-aýystyryp otyrǵyzý torabyn jańa meshit aýdanynda qurýǵa bolar edi. Olardy «iskerlik aýdandar jobasy» dep te ataýǵa bolady. Mundaı toraptar tek kólik ınfraqurylymyn, ıaǵnı parkıngti, termınaldardy, LRT; BRT stansalaryn ǵana emes, sonymen birge saýda oıyn-saýyq keshenderin, bıznes ortalyqtardy, saýda zaldaryn qamtıdy», - dedi ol «Astana qalasynyń 2035 jylǵa deıingi bas josparynyń» jańa jobasy boıynsha qoǵamdyq talqylaý aıasynda QazAqparat tilshisine bergen suhbatynda.
Onyń atap ótýinshe, mundaı kólik toraptary qalaǵa úlken kireberisterdiń bárinde qurylady.
«Aıtalyq, eger adam Qosshydan kele jatsa, atalǵan torapqa kóligin qaldyryp, qoǵamdyq kólikke aýysyp minip, qalaǵa barady. Mundaı toraptar qalanyń barlyq radıaldy kireberisterindegi barlyq qıylystarda salynady. ıAǵnı, Qosshy, Qorǵaljyń tas joly, Qostanaı, Kókshetaý, Qaraǵandy baǵyttarynda bolady», - dedi Aqmaral Temirova.
Astana Bas jospary ókiliniń atap ótýinshe, osylaısha atalǵan kólik-aýystyryp otyrǵyzý toraptary qalamańy aımaǵynyń barlyq kólik júktemesin ózine jınaıdy.
«Jospardyń esepti kezeńi – 2035 jyl. Degenmen, biz 2050 jylǵa deıin qamtyp otyrmyz. Óıtkeni 2050 jylǵa qaraı aıtarlyqtaı júkteme bolady jáne halyq sany artady. Kóshe-jol jelisine júktemeni azaıtý, qaladaǵy avtomobılder sanyn tómendetý úshin syrttan keletin jeke kólikterdi barynsha qysqartýymyz qajet», - dedi ol.
Jobalaý ınstıtýtynyń jetekshi sáýletshisi Azamat Oshahmetov mundaı iskerlik aýdandar qalanyń 6 jerinde salynatyndyǵyn naqtylaı tústi.
«6 jerde iskerlik aýdandar salynady. Máselen, qazirgi ýaqytta Pavlodar men Qostanaıdan kúnine shamamen 100 myń adam júrip ótedi. Qala ortalyǵyna osy júktemeni boldyrmaý úshin atalǵan jobany usynyp otyrmyz. Ol jerde bıznes ortalyqtary, parkıng, qonaq úıler, sýpermarketter, saýda oıyn-saýyq ortalyqtary, tipti kelýshilerge yńǵaıly bolýy úshin Halyqqa qyzmet kórsetý ortalyqtary men salyq organdary da bolady», - dedi ol.
Aıta keterligi, bul joba áli kelisý satysynda qaralyp jatyr.
