Elordada iship alyp áıeline tıisken er adam 7 táýlikke qamaýǵa alyndy
ASTANA. QazAqparat - Elorda turǵynynan 102 arnasyna mas kúıeýiniń úıinde janjal shyǵarǵany, sondaı-aq, balaǵat sózder aıtyp, ar-namysy men abyroıyna nuqsan keltirgeni týraly habarlama kelip tústi, dep habarlaıdy Astana qalasy PD-niń baspasóz qyzmeti.
Polıtseıler Astana turǵynynyń mas kúıinde otbasylyq janjal shyǵarǵanyn anyqtady. Onyń barysynda ol áıeline qatysty ádepsiz sózder aıtyp, psıhologııalyq zorlyq-zombylyq kórsetken. Sóıtip, otbasy-turmystyq qatynastar salasynda zańǵa qaıshy áreketter jasaǵan.
Belgili bolǵandaı, bul onyń mas kúıinde úıinde janjal shyǵaryp, otbasynyń tynyshtyǵyn buzǵan birinshi oqıǵasy emes.
«Almaty» aýdandyq polıtsııa basqarmasynyń ýchaskelik polıtsııa ınspektory otbasylyq janjalqoıǵa qatysty QR ÁQBtK-niń 73-babynyń 2-bóligi boıynsha ákimshilik hattama toltyrdy.
Ákimshilik quqyq buzýshylyq isteri jónindegi Mamandandyrylǵan aýdanaralyq sotynyń qaýlysymen er adam 7 táýlik merzimge, sondaı-aq, quqyq buzýshynyń tártibine 12 aı merzimge alkogoldik ishimdikterdi, esirtki jáne psıhotroptyq zattardy paıdalanbaýǵa belgilengen erekshe talapty buzǵany úshin er adam 21 táýlikke Medıtsınalyq áleýmettik ońaltý ortalyǵyna ornalastyrylady.
Eske sala ketsek, quqyq buzýshylyqtyń aldyn-alýdy kúsheıtý, qoǵamdyq qaýipsizdikti qamtamasyz etý maqsatynda elordalyq polıtsııa departamentiniń qyzmetkerleri «Qoǵamdyq qaýipsizdik» is-sharasyn ótkizýde.
JPІSh bastalǵannan beri tártip saqshylary otbasy-turmystyq qatynastar salasyndaǵy zańsyz áreketterdiń 470-ke jýyq faktisin, 461 qorǵaý nusqamasyn buzý faktisin anyqtady, azamattardyń tynyshtyǵyn buzǵan 2246 tulǵa jáne alkogoldik ishimdikterdi ishken 2231 tulǵa anyqtaldy.
Astana qalasy Polıtsııa departamenti zorlyq-zombylyq qurbany bolǵan jaǵdaıda dereý polıtsııaǵa 102 telefony nemese áıelderdi zorlyq-zombylyqtan qorǵaý bóliminiń 8-(7172)-71-60-63 senim telefony arqyly habarlasý kerektigin, onda polıtseılerdiń Sizge quqyqtyq keńes beretinin habarlaıdy.
