Elordada iQala qalalyq qyzmetter ortalyǵy ashyldy
Keńse Nur-Sultan qalasy ákimdiginiń túrli basqarmalarynyń, kommýnaldyq qyzmetterdiń, kásipkerlikti damytý men qoldaý ınstıtýttarynyń jumysyn biriktirip, «bir tereze» qaǵıdatynda jumys isteıdi.
«iQala-nyń birinshi «i» árpi ıntellektýaldyq júıe degen maǵynany beredi. Joba qalanyń barlyq kommýnaldyq qyzmetteri men basqarý júıesin «Adaldyq alańy» aıasynda damytýy qajet. Bul ortalyqtan túrli qyzmetter men keńesterdi, ruqsattamalardy jyldam alýǵa bolady. Bul júıe barlyq qyzmetterdi tsıfrlandyrýǵa jol ashady jáne kásipkerler aldyndaǵy kedergilerdi joıyp, baǵa men tarıftiń tómendeýine kómektesedi», - dedi elorda ákimi Baqyt Sultanov ortalyqtyń ashylýynda.
Máselen, úı salǵysy kelgen turǵyn 5 birdeı kommýnaldyq qyzmetke júginip, ondaǵan qujat jınaýy kerek. Munyń barlyǵyna 6-8 aı jumsalýy múmkin. Al endi osy qyzmetterdi bir orynnan alýǵa bolady.
«Bir aıda iQala qyzmet kórsetý ortalyǵy kórsetetin qyzmetterdi 100-ge jetkizgimiz keledi. Jyl sońyna deıin «Bir tereze - bir nátıje» qyzmeti iske qosylady. Bul jeke tulǵalarǵa da, bızneske de yńǵaıly», - dedi «Astana» ÁKK tóraǵasynyń birinshi orynbasary Temirlan Nurǵısaev.
