Elordada Imanov kóshesindegi ýchaske ýaqytsha jabyldy
NUR-SULTAN. QazAqparat - Elordanyń Kólik jáne jol-kólik ınfraqurylymyn damytý basqarmasy qalalyq PD ákimshilik polıtsııa basqarmasynyń kelisimimen jol qozǵalysy qaýipsizdigin qamtamasyz etý úshin Imanov kóshesinde jol tósemin ortasha jóndeý jumystaryn bastady, dep habarlaıdy QazAqparat qala ákimdiginiń resmı saıtyna silteme jasap.
Osy jyldyń 22-23 shilde aralyǵynda jóndeý jumystarynyń júrgizilýine baılanysty Imanov kóshesiniń «Aqbulaq» kópirinen A.Jubanov kóshesine deıingi aralyǵy tolyǵymen jabylady.
«Qala joldarynda keptelis týdyrmas úshin elorda turǵyndary men qonaqtary qozǵalys baǵytyn aldyn ala josparlaýy qajet. Keltirilgen qolaısyzdyqtar úshin keshirim suraımyz jáne jóndeý jumystarynyń júrgizilýine túsinistikpen qaraýdy suraımyz», - delingen kólik basqarmasynyń habarlamasynda.
