Elordada iKOMEK109 ortalyǵy 18 mln turǵynnyń ótinishin óńdedi
ASTANA. KAZINFORM — 2018 jyldan beri biryńǵaı iKOMEK109 baılanys ortalyǵy Astana turǵyndary men qonaqtarynan túsken 18 mıllıon ótinishti qabyldap, óńdedi, dep habarlaıdy elorda ákimdiginiń resmı saıty.
Búginde ortalyq qalany basqarý júıesiniń negizgi býyndarynyń birine aınalyp, memlekettik organdardyń, kommýnaldyq qyzmetterdiń, aýdan ákimdikteri men jedel qyzmetterdiń jumysyn úılestiredi.
— 2026 jyldyń basynan beri iKOMEK109 ortalyǵyna 1,5 mıllıonnan astam ótinish túsken. Turǵyndar kóbine keńes alý úshin júginedi. Negizgi máseleler qatarynda densaýlyq saqtaý, qoǵamdyq kólik, elektrmen qamtý, kommýnaldyq qyzmetter jáne qalalyq ınfraqurylym bar, — delingen habarlamada.
2026 jyldyń qańtarynda baılanys ortalyǵy Qalalyq monıtorıng jáne jedel áreket etý ortalyǵynyń mamandary ázirlegen jeke aqparattyq júıe — iKOMEK 2.0 platformasyna tolyqtaı kóshti. Jańa júıe ótinishtermen jumys isteýdiń barlyq kezeńin qamtıdy, ótinishterdiń oryndalý merzimin baqylaýǵa, qaıtalanatyn ótinishterdi anyqtaýǵa jáne naqty ýaqyt rejıminde taldaý júrgizýge múmkindik beredi.
Búginde iKOMEK109 dástúrli baılanys ortalyǵynan qalany zamanaýı ahýaldyq basqarý júıesine qaraı damyp keledi. Turǵyndardyń ótinishterin taldaý, tsıfrlyq servıster men jasandy ıntellekt tehnologııalary júıeli máselelerdi jedel anyqtaýǵa, yqtımal táýekelderdi aldyn ala boljaýǵa jáne memlekettik qyzmetterdiń sapasyn arttyrýǵa múmkindik beredi.
Buǵan deıin Astanada 350 úlesker kópten kútken páterlerine qonystanǵanyn jazǵanbyz.
