Elordada ІІІ Astana ınternet forýmy ótip jatyr
Dástúrli forýmnyń bıylǵy taqyryby - Qazaqstandaǵy aqparattyq keńistiktiń qaýipsizdik máseleleri, aqparattyq qysym jáne jalǵan aqparattandyrý, áleýmettik jelilerdegi dinı-ekstremıstik ıdeologııa, ınternet jelisindegi aqparattyq qaýipsizdikti qamtamasyz etýdiń áleýmettik-saıası jáne tehnıkalyq aspektileri. «Búgin bastalǵan Astana Internet forýmy osymen úshinshi márte uıymdastyryldy. «Nur Otan» partııasynyń qoldaýymen, Eýrazııa ulttyq ýnıversıteti muryndyq bolyp ІT salasyndaǵy qyzmetkerlerdiń basyn qosyp otyr. Negizgi maqsat - qazaq tildi ınternet jasaýshylardyń, qazaq tilin paıdalanýshylardyń, jalpy, saıt jasaýshylardyń basyn qosyp, tájirıbe almasý. Jalpy, qazirgi álemdi ınternetsiz elestetý qıyn. Ásirese, kez kelgen jastyń qolynda ınternet bar. Sondyqtan búgingi forým jastarymyzǵa baǵyt-baǵdar beredi dep oılaımyn», - deıdi «Nur Otan» partııasy Tóraǵasynyń birinshi orynbasarynyń keńesshisi Berik Ýálı. Al bıylǵy forýmnyń taqyryby - aqparattyq qaýipizdik turǵysynda. «Aqparattyq qaýipsizdik salasynda neden utylyp, neden utyp jatyrmyz dep birjaqty aıtý qıyn. Degenmen, úsh jyl buryn aqparattyq qaýipsizdik týraly aıtqan kezde, kóbine baıbalammen ómir súretin edik, problemalardy sózben kórsetetinbiz. Al basqa salalarǵa qaraǵanda, ınternet salasyndaǵy qyz-jigitterdiń bir ereksheligi - sózden góri naqty iske qaraı beıimdelgen»,- deıdi B.Ýálı. Jalpy, keshke deıin jalǵasatyn forýmda eki aýdıtorııaǵa bólingen mamandar «Aqparattyq keńistik qaýipsizdigin qorǵaýdyń saıası-áleýmettik aspektileri» jáne «Aqparattyq keńistik qaýipsizdigin qorǵaýdyń tehnıkalyq aspektileri» degen taqyryptar boıynsha sheberlik synyptaryn ótkizedi.
