Elordada «Han shatyrda - Han doıby» atty jarys-aktsııa ótkizildi
ANA. 2 maýsym. QazAqparat - Elordalyq «Astana» jýrnalynyń uıymdastyrýymen 1 maýsymda basylymnyń 10 jyldyq mereıtoıyna jáne Balalar kúnine oraı,
«Han shatyr» oıyn-saýyq ortalyǵynda Nursultan esimdi oqýshylardyń arasynda kóne túrkilik doıby oıynynan «Han shatyrda - Han doıby» atty jarys-aktsııa ótti.
Jarysqa on eki Nursultan qatysty. Qyryqtan astam Nursultan jáne oıyn-saýyq ortalyǵyna balalaryn erte kelgen qalyń jurtshylyq tamashalady. Doıbyǵa qatysqandardyń barlyǵy osydan bir jyl buryn taǵy da «Astana» jýrnalynyń uıymdastyrýymen ótkizilgen «Han qalada - Han doıby» jarysynda oıynnyń erejesin úırengen bolatyn.
«Han doıbysynyń ǵajaıyby - onyń kestesinde. Onda astronomııalyq ilimnen bastap fılosofııa, ekonomıka, ǵylym, mádenıet, saıasat, memleket qurý júıesi, dala demokratııasy sııaqty taǵy basqa san alýan sala bir tuǵyrda toǵysady. Kerek deseńiz, on segiz myń ǵalamnyń tilin qazaqtyń sózinde sheship berýge negiz salady.
Baıaǵy baǵzy zamannan beri handardyń, bılerdiń, bekterdiń el basqarý, memleket qurý aqyldaryn syn tezine túsirip synaıtyn oıyn bul. Han doıbysy - jalpy on jyldan astam ýaqytta qazaqtyń rýhanııatyn qadala baǵyp baıqaýmen, san saraptap salystyrýdan paıda bolyp, jetilgen oıyn.
Kestesi qazaqtyń oıý-órnekterimen naqyshtalǵan. Al taqtadaǵy ortaq fıgýra - qazaqtyń kıiz úıi. Kıiz úıdiń syrtyndaǵy oıý-órneginiń, shańyraǵynyń túsi arqyly olardyń ataq-dárejesin, naqtylaı aıtsaq hany men qarashasyn, bıi men begin anyqtaýǵa bolady. Bul - aqyl-parasattyń, el basqarýdaǵy parasattylyqty synaý oıyny. Sondyqtan da onyń tórelegi de ádil. Jeńgeni erýlik alyp, han bolyp el suraıdy, jeńilgeni aıybyna jurtynyń bıligin beredi. Tańǵaldyratyny, júristiń sharty boıynsha japonnyń túımeleri, úndiniń shahmaty, qytaıdyń patshalyq saıysy doıbylaryndaı qarsylasyńdy ımperııalyq- qaǵanattyq júıemen tup-tuqııanymen qurtýǵa jol berilmeıdi, qaıta jeńilgendi moıyndatyp, el bolyp qosylýǵa jol beredi. Mine bul, baıyrǵy handyq júıeniń demokratııalyq qaǵıdasy» - deıdi oıyndy jańǵyrtýshy azamat Ánýar Qabdoldauly.
Bir jarym saǵatqa sozylǵan tartysty oıynnyń nátıjesinde Han doıbysyn jete meńgergen úsh jeńimpaz anyqtaldy:
I oryn ıgeri - Nursultan Shıbıshev. Bas júlde - teledıdardy «Astana» jýrnalynyń dırektor-Bas redaktory Maqsat Táj-Murat tapsyrdy.
II orynnyń ıegeri Nursultan Kapanovqa «Túgel» baspasóz klýbynyń prezıdenti Áıgerim Túgel uıaly telefon syılady.
III oryndy jeńip alǵan Nursultan Júnisovke «Kar-Tel» (Beeline uıaly baılanys operatory) JShS Astana jáne Aqmola oblysyndaǵy fılıalynyń dırektory Musaǵalı Qalımusa USB-modem syılady.
Sondaı-aq toǵyz qatysýshyǵa «Kórkem óner» teatraldy-óner salonynyń dırektory Qorlan Qusaıynovanyń atynan kitaptar, Beeline kompanııasynyń atynan brendti rıýgzaktar men doptar tabys etildi.
Jarys-aktsııany «Han Shatyr» oıyn-saýyq ortalyǵy qoldap, Qýyrshaqtar teatrynyń, Marat Omarovtyń «Talant» ortalyǵynyń, Astanadaǵy №2 Óner mektebiniń, №59 mekteptiń jas ónerpazdary óner kórsetti.
