Elordada halyqtyń áleýmettik osal toptary azyq-túlikti arnaıy karta arqyly satyp alady

NUR-SULTAN. QazAqparat – Elordada halyqtyń áleýmettik osal toptaryna azyq-túlik arnaıy karta arqyly ótkiziledi. Bul týraly Nur-Sultan qalasynyń Investıtsııalar jáne kásipkerlikti damytý basqarmasynyń basshysy Erjan Baltaev aıtty, dep habarlaıdy QazAqparat tilshisi.

«Qazirgi kezde «Magným» JShS-men birlese halyqtyń áleýmettik osal toptary úshin karta boıynsha arzandatylǵan taýardy ótkizýdiń qanatqaqty jobasyn pysyqtap jatyrmyz, ıaǵnı olarda ózderiniń kartalary bar. Osy oraıda halyqtyń áleýmettik osal toptarynyń tizimin engizbekpiz. Bul turǵyda 160 myńǵa tarta adam bar», - dedi E. Baltaev qalalyq máslıhattaǵy turaqty komıssııanyń otyrysynda.

Onyń aıtýynsha, atalǵan karta arqyly azyq-túlik ónimderin osy sanattaǵy adamdar ǵana alady.

«Al tabysy jetkilikti deńgeıdegi adamdar ónimdi naryq baǵasymen satyp alady. Atap aıtqanda, qaralyp otyrǵan bul qadamdar arzandatylǵan taýardy halyqtyń áleýmettik osal toptaryna ótkizýge múmkindik beredi», - dedi basqarma basshysy.

Budan buryn habarlanǵandaı, bıyl shilde aıynda Premer-Mınıstrdiń orynbasary – Saýda jáne ıntegratsııa mınıstri Baqyt Sultanov jyl basynan beri áleýmettik mańyzy bar azyq-túlik taýarynyń baǵasy 17,4%-ǵa kóterilgenin habarlady.

Pııaz, qant, sábiz, kartop, qaraqumyq, makaron, un jáne qyryqqabat baǵalary eń kóp ósken.