Elordada halyqpen jappaı sporttyq jattyǵýlar jasaý aktsııasy bastalady
ASTANA. 18 mamyr. QazAqparat - Búgin elordada keshki saǵat 19:00-den 20:00-ge deıin Oqýshylar saraıy aldyndaǵy alańda «Ómir energııasynan qýat al!» atty aktsııa aıasynda aǵymdaǵy jylǵy alǵashqy buqaralyq jattyǵý sharasy ótedi.
Alǵash ret ótken jyly elimizde qolǵa alynǵan atalǵan sharanyń tanymaldyǵynyń artýyna baılanysty osy maýsymda onyń baǵdarlamasyna kópqyrly jattyǵý túrleri kirgizilgen. Olardyń eńbektegen baladan eńkeıgen qartqa da, memlekettik qyzmetker men kásipkerge de zor paıdasy bar.
Bıyl jattyǵý sharasy 14 qyrkúıekke deıin árbir juma kúni joǵaryda atalǵan alańda keshki saǵat 19:00-den 20:00-ge deıin ótkiziledi.
Aıta keteıik, ótken jyly bul sporttyq sharanyń jazdyq maýsymyna 6500-den astam elordalyq qatysqan bolatyn.
