Elordada halyqaralyq úrmeli aspaptar festıvali ótedi
ASTANA. QazAqparat - Elorda kúni merekesine oraı Qazaqstannyń jáne shet elderdiń úzdik úrmeli aspaptar orkestrleri osymen 8-shi jyl qatarynan «Astana Samaly» halyqaralyq festıvalinde bas qosady. 4-6 shilde kúnderi aralyǵynda qalanyń barlyq alańynda ádemi áýender estiletin bolady, dep habarlaıdy QazAqparat Astana ákimdiginiń resmı saıtyna silteme jasap.
Bıyl festıvalge Astana qalasynyń Memlekettik akademııalyq fılarmonııasynyń, QR Ulttyq ulannyń, MKQ-nyń, Mońǵolııa Qorǵanys mınıstrligi Áskerı ýchılışesiniń, sondaı-aq Bishkek qalasynyń Merııasy janyndaǵy úrmeli aspaptar orkestrleri qatysady.
Sharanyń ashylýy 4 shildede saǵat 20.00-de qalalyq alańda ótedi. Kelesi kúni saǵat 10.00-de mýzykalyq mereke qalalyq saıabaqtarda jáne basqa alańdarda jalǵasyn tabady. Al keshke «Báıterek» monýmentiniń janynda bend-marafon uıymdastyrylady. Festıvaldiń sońǵy kúni barlyq ujymdardyń qatysýymen Parad-kontsert ótedi.
Sherý Respýblıka dańǵylymen Áskerı-tarıhı mýzeıden Jastar saraıyna deıin júrip ótedi.
«Astana Samaly - 2017» festıvali qalalyq alańda Plats-kontsertpen aıaqtalady.
