Elordada Halyqaralyq túrki akademııasynyń jańa ǵımaraty ashyldy
Jańa ǵımarattyń ashylý saltanatyna Memlekettik hatshy Qyrymbek Kósherbaev bastaǵan birqatar zııaly qaýym ókilderi qatysty.
«Elbasy Nursultan Nazarbaevtyń bastamasymen ashylǵan Túrki akademııasy búginde túrkitildes baýyrlardy rýhanı baılanystyratyn bedeldi halyqaralyq uıymǵa aınalyp otyr. Memleket basshysy Qasym-Jomart Toqaevtyń qoldaýymen búgin mine akademııanyń jańa qonysqa kóshý sátine kýá bolyp otyrmyz. Jańa ǵımarat barshaǵa qutty bolsyn! Halyqaralyq Túrki akademııasy týysqan halyqtardyń tili, ádebıeti, mádenıetiniń zaman talabyna saı jańǵyrýyna úlken úles qosyp keledi. Osy sátte túrik baýyrlarymyzdy búgingi ulttyq merekesimen quttyqtaımyz», - dedi Qyrymbek Kósherbaev aıtýly sharada.
Sondaı-aq, akademııanyń jańa ǵımaratynda mýzeı men kitaphana bar. Onda túrki álemine qatysty jádigerler men ádebı týyndylar qoıylǵan.
«2009 jyly Elbasynyń bastamasymen Halyqaralyq túrki akademııasy qurylyp, 2010 jyly akademııaǵa elordadaǵy Beıbitshilik jáne kelisim saraıynyń ishinen bólek keńse berildi. Búgin mine Memleket basshysynyń tapsyrmasyna saı akademııaǵa bólek ǵımarat berilip otyr. Jańa ǵımaratymyz eki bólikten turady, bir bóligi mýzeı jáne kitaphana. Ekinshi jaǵynda qyzmetkerlerge arnalǵan jumys kabınetteri. Mýzeıdiń ózi 3 bólikten turady, alǵashqy bólim túrki halqynyń etnografııasyna arnalǵan, ekinshi bólim jalpy túrkologııaǵa arnalǵan jáne akademııaǵa syıǵa tartylǵan syı-syıapattar bólimi bar», - dedi halyqaralyq Túrki akademııasynyń prezıdenti Darhan Qydyráli.
Odan bólek, akademııa basshysy jańa ǵımaratta aldaǵy ýaqytta túrli is-sharalardyń uıymdastyrylatynyn tilge tıek etti.
Osy oraıda búgin akademııa qabyrǵasynda elimizden shyqqan tuńǵysh antropolog, qazaq antropologııasynyń negizin salýshy Orazaq Smaǵulovtyń «Qazaq halqy men onyń ata tegine oraı antropologııalyq ocherekter» atty jańa kitaby tanystyryldy.
Aıta keteıik, Túrki akademııasynyń jańa qonysy elordanyń «Dıplomattar qalashyǵy» turǵyn úı alabynan ashylyp otyr.
