Elordada halyqaralyq «Shyǵys qaqpasy» ortalyǵy salynady
NUR-SULTAN. QazAqparat - Qazaqstannyń bas qalasynda halyqtardyń qurylý tarıhy men mádenıetine arnalǵan halyqaralyq ortalyq ashylady. Bul týraly búgin Nur-Sultan qalasy Investıtsııalar jáne kásipkerlikti damytý basqarmasynyń basshysy Erlan Bekmyrzaev málim etti, dep habarlaıdy QazAqparat tilshisi.
«Elbasy Nursultan Nazarbaevtyń «Uly dalanyń jeti qyry» atty maqalasy negizinde «Shyǵys qaqpasy» jobasyn salý jospary bar. Bul halyqtardyń qurylý tarıhy men mádenıetin jınaqtaǵan biregeı halyqaralyq ortalyq bolyp tabylady. Qazirgi ýaqytta ortalyqtyń eskız ıdeıasy kelisilip, joba ázirlený ústinde», - dedi E. Bekmyrzaev qalalyq máslıhattyń otyrysynda jasaǵan baıandamasynda.
Odan bólek, basqarma basshysy elordada jańadan iri oıyn-saýyq ortalyǵy, akvasaıabaq, zamanaýı óner ortalyǵy, ǵarysh murajaıy, tropıkalyq baq jáne qysqy sport ortalyǵy salynatynyn tilge tıek etti.
«Sonymen qatar qalalyq týrızmdi damytý baǵytynda sheshimin kútken birqatar problemalar da bar. Atap aıtar bolsaq, statıstıkalyq eseptiń jetispeýshiligi. ıAǵnı qalaǵa keletin keıbir týrıster hostel ne bolmasa páter jaldap turady, al ol esepke alynbaıdy. Sondaı-aq, qaladaǵy jeke týrıstik uıymdar men agenttikterdi kvazımemlekettik sharalarǵa belsene qatysýǵa shaqyrý qajet. Jáne bizde kórshiles qalalarmen týrızm salasyndaǵy ózara yntymaqtastyq joq. Osy olqylyqtyń ornyn toltyrý maqsatynda Qaraǵandy jáne Aqmola oblystarymen týrızm salasynda birikken jobalardy qolǵa alý múmkindigin qarastyrýdamyz», - dedi ol.
Sonymen qatar, E. Bekmyrzaev jaqyn kúnderi qala týrısteri úshin oń jaǵalaýdaǵy nysandarǵa arnalǵan 2 týrıstik avtobýstyń jolǵa shyǵatynyn aıtyp ótti.
