Elordada Halyqaralyq shahmat kúni atap ótildi
ASTANA. 20 shilde. QazAqparat - Búgin Astanada halyqaralyq shahmat kúni atap ótildi. Osyǵan oraı elordaǵa elimizdiń kórnekti grossmeısterleri keldi, dep habarlaıdy astana.kz saıtyna Qazaqstan Respýblıkasynyń Shahmat Federatsııasy.
Halyqaralyq shahmat kúni Dúnıejúzilik Shahmat Federatsııasynyń bastamasy boıynsha 1966 jyldan beri atap ótilip keledi. Bul kúni túrli ıgi is-sharalar ótkizý dástúrge aınaldy. Bıylǵy jyly shahmat kúni qurmetine «Han Shatyr» saýda oıyn-saýyq ortalyǵy ǵımaratynda óner, sport jáne ǵylym negizderinen is-sharalar uıymdastyrylady.
«20 shildede Astanada Halyqaralyq shahmat kúni QR memlekettik jattyqtyrýshysy, grossmeıster Nurlan Ibraevpen birge atap ótilýde. Sondaı-aq, bul kúni elordaǵa elimizdiń shahmat qurama komandasynyń oıynshylary Rınat Jumabaev pen Ánýar Ismaǵambetov keledi», - delingen habarlamada.
Merekelik baǵdarlamaǵa baıqaýlar, oıyn-saýyqtar, elimizdiń jetekshi grossmeısterleriniń bir oıyndyq seanstary kiredi.
Sońǵy jyldary Qazaqstanda shahmat oıyny keńinen taralýda. 2012 jyly shildede elordamyzda blıts pen jyldam shahmattan Álem chempıonaty ótti. Bul - Halyqaralyq Shahmat Federatsııasynyń Qazaqstanǵa degen seniminiń joǵary ekendiginiń belgisi. Buǵan 2013 jyly naýryz aıynda áıelder arasyndaǵy komandalyq chempıonatty ótkizý úshin FIDE-niń Astanany tańdaýy dálel bolady. Áıelder arasyndaǵy álemdik shahmat forýmy Qazaqstanda tabysty ótti, al elimizdiń jas áıelder quramasy álemdik mamandardyń qurmetine ıe boldy.
