Elordada halyqaralyq murajaılar kúnine arnalǵan sharalar ótedi

Іs-sharalar aıasynda Mádenıet mınıstrligi jáne Astana ákimdigi Halyqaralyq murajaılar keńesiniń ulttyq komıtetimen (Qazaqstannyń ICOM) birlesip, zııaly qaýym ókilderiniń, mádenıet qaıratkerleriniń, Qazaqstannyń murajaı qyzmetkerleriniń qatysýymen «Máńgilik elge saıahat» taqyrybynda dóńgelek ústel uıymdastyrady, sonymen birge murajaı qyzmetkerleriniń úzdigi men murajaı isiniń ardagerlerin qurmetteý saltanaty ótedi.

Dóńgelek ústel ótkizýdiń maqsaty - tarıh pen mádenıet tutastyǵy máselelerin talqylaý; QR Prezıdenti N. Á. Nazarbaevtyń «Qazaqstandyq jol - 2050: bir maqsat, bir múdde, bir bolashaq» Joldaýy turǵysynan murajaı isi damýynyń jaqyn aradaǵy keleshegin aıqyndaý bolmaq.

Jyl saıyn 18 mamyr kúni óner saqtaýshylary - dúnıe júzindegi murajaı qyzmetkerleri ózderiniń kásibı merekesin - Halyqaralyq murajaı kúnin merekeleıdi. Atalǵan meıram 1977 jyly Halyqaralyq murajaılar keńesiniń (ICOM) otyrysynda murajaılar kúnin merekeleý týraly sheshim qabyldanǵannan bastap atap ótiledi. 1978 jyldan bastap bul mereke álemniń 150-den astam memleketinde atalyp keledi.

Halyqaralyq murajaılar keńesiniń (ICOM) bastamasymen bıylǵy jyly meıramnyń urany - «Murajaı jınaqtamasy biriktiredi» dep tańdaldy. Qazirgi tańda Qazaqstan Respýblıkasynda ár túrli baǵyttaǵy 223 murajaı jumys isteıdi, olar: tarıhı-ólketený, etnografııalyq, kórkemdik, memorıaldyq jáne t.b.

Murajaı qorlary men ekspozıtsııalarynda shamamen 2,3 mln. materıaldyq jáne rýhanı eskertkishter bar. Sońǵy jyldary jaqyn jáne alys shetel muraǵattaryna, kitaphanalaryna jáne murajaılaryna maqsatty ǵylymı ekspedıtsııalar men issaparlarǵa shyǵý nátıjesinde elimizdiń murajaı qorlary jańa derekti materıaldarmen jáne biregeı artefaktylarmen tolyqty.

Dástúr boıynsha, 18 mamyr kúni elimizdegi murajaılardyń esigi kópshilik úshin ashyq. Bul kúni kóptegen is-sharalar, taqyryptyq ekskýrsııalar jáne «Murajaıdaǵy tún» aktsııalary ótkiziledi.