Elordada halyqaralyq marafonǵa oraı birqatar negizgi kósheler jabyq
ASTANA. QazAqparat - Búgin elordada qaıyrymdylyq maqsattaǵy iri halyqaralyq Astana marafonyna tańǵy saǵat 8-den 14:00-ge deıin Astanada birqatar negizgi kóshelerde qozǵalys shekteldi.
Jarys «Han Shatyrdan» bastaldy jáne osy jerde qatysýshylar máre syzyǵyn qıyp ótedi.
Atap aıtqanda, sol kúni 14:00-ge deıin qaladaǵy qyryq avtobýs baǵdary toqtatyldy, al 19 baǵdarda qozǵalys syzbasy ózgeredi.
Osy rette marafon ótken ýaqytta № 1, 2, 3, 4, 10, 12, 14, 17, 18, 19, 20, 21, 26, 27, 28, 29, 31, 32, 33, 35, 36, 40, 43, 46, 50, 51, 52, 55, 56, 60, 61, 70, 73, 101, 102, 103, 302, 303, 308, 309 marshrýttary júrmeıdi.
Budan buryn habarlanǵandaı, qalalyq ІІD Ákimshilik polıtsııa basqarmasy basshysynyń orynbasary Eljan Shúpekov marafonǵa qatysýshylar erterek júgirip ótken kóshelerde qozǵalys ýaqytynan buryn ashylýy múmkin ekenin málim etti.
«Marafon ótetin kúni osy sportshylar júgiretin baǵdarda qozǵalysty tolyqtaı shekteımiz. Osy baǵdarlardy BAQ-tan, ınternet-portaldardan kórýge bolady. Bul baǵdarlarda kóldeneń qozǵalystarǵa da shekteý qoıamyz. Ózderińiz bilesizder, marafon álemdik aýqymda ótkeli jatyr, ıaǵnı Astana úshin mańyzdy shara bolyp tabylady. Qosshyǵa qaraı jol da marafonǵa baılanysty jabylady. Biz saǵat 07:30-dan 14:00-ge deıin joldardy jabatyn bolamyz. Degenmen de marafonǵa qatysýshylar erterek júgirip ótken kóshelerde qozǵalys ýaqytynan buryn ashylýy múmkin»,-dedi E. Shúpekov.
Sonymen qatar ol 4 qyrkúıekte Qazaqstan men Polsha komandalary arasynda fýtbol matchynyń ótkizilýine baılanysty Turan dańǵylynyń ýchaskeleri boıynsha, Qabanbaı batyr dańǵylynyń Kereı jáne Jánibek handar kóshesinen bastap Hýseın ben Talal kóshesine deıingi aralyqta qozǵalys shekteletinin atap ótti.
Osy rette qoǵamdyq kólikterdiń qozǵalysyna basymdyq beriledi. Sondyqtan da jankúıerlerge avtobýspen fýtbolǵa kelýi usynylyp otyr. Arnaıy bes otyrǵyzý alańdary uıymdastyrylady, ıaǵnı «Qazaqstan» sport kesheni, «Haziret Sultan» men «Nur Astana» meshitteri mańyndaǵy avtoturaqta, elordalyq tsırk mańyndaǵy jáne Q. Muńaıtpasov atyndaǵy stadıon janyndaǵy avtoturaqta alańdar bolady.
