Elordada Halyqaralyq balalardy qorǵaý kúni 80-ge jýyq náreste dúnıege keldi

NUR-SULTAN. QazAqparat – Halyqaralyq balalardy qorǵaý kúni elordada 80-ge jýyq shaqalaq dúnıege keldi, dep habarlaıdy QazAqparat Nur-Sultan ákimdiginiń resmı saıtyna silteme jasap.

1 maýsym kúni keshke deıin astanadaǵy kópbeıindi aýrýhanalardyń bosaný bólimshelerinde 78 bala týdy, onyń 37-si – qyz, 41-i – ul,

Baqytty analardy qala ákimdigi atynan Qoǵamdyq densaýlyq saqtaý basqarmasynyń basshysy Tımýr Muratov quttyqtap, shahar basshysy Altaı Kólginovtiń alǵys hatyn tabystady.

Sábılerdiń analaryna estelik syılyqtar – balalar arbalary, jańa týǵan nárestelerdiń kórpeshesi jáne taǵy basqasy tartý etildi. Keıbir balalar týý týraly kýálikterin de alyp úlgergen.

Aıta keteıik, osy kúni qalalyq mamandandyrylǵan balalar úıinde de merekelik shara ótti. Ondaǵy búldirshinderdi qala ákimdigi, qoǵamdyq qorlar, basqa elder elshilikteriniń ókilderi quttyqtady. Qalalyq emhanalarda anımatorlar qatysqan ashyq esik kúnderi, merekelik baǵdarlamalar ótti.