Elordada halyq jazýshysy Sáken Júniske eskertkish taqta ornatyldy

«Sáken seri Nurmaquly 20 ǵasyrdyń ekinshi jartysyndaǵy qazaqtyń ádeıbetindegi asa kórnekti, uly ókilderdiń biri. Ol kisiniń qalamynan týyndaǵan epıkalyq-prozalyq týyndylar, dramalyq shyǵarmalar bizdiń ónerimizge, mádenıetimizge sol sanatta ulttyq ádebıetimizge olja salǵan dúnıeler. Sondyqtan mine resmı oryndardyń, jalpy ordaly qaýymnyń jazýshynyń sońǵy kúnderi ótken, turǵan úıine osyndaı eskertkish taqta ornatyp jatýy ónerge, ádebıetke, darynǵa degen qurmet dep baǵalaımyz», - dedi eskertkish taqtanyń ashylýynda sóz alǵan Qazaqstan Jazýshylar odaǵynyń tóraǵasy Nurlan Orazalın.

Sonymen qatar sharaǵa qatysqan Sáken Nurmaqulynyń qaryndasy Roza apa da qýanyshyn jasyrmaı eskertkishtiń ashylýy búkil halqy úshin, týǵan-týystary úshin zor mártebe dep biletindigin jetkizdi.

Aıta keteıik, Sáken Júnis - Qazaqstannyń halyq jazýshysy, dramatýrg. «Qazaq ádebıeti» gazetiniń bólim meńgerýshisi, KSRO Ádebı qory Qazaq bólimshesiniń dırektory, Qazaqstan Jazýshylar odaǵynyń hatshysy qyzmetterin atqarǵan. Qalamgerdiń «Amanaı men Zamanaı» romany  boıynsha «Zamanaı» atty kórkem fılm túsirilgen. Onyń «Ajar men ajal», «Tutqyndar», «Jaraly gúlder», «Qyzym, saǵan aıtam», «Qos anar», «Ár úıdiń erkesi», «Qysylǵannan qyz boldyq», «Krossvord», «Elim-aı», «Sabalaq Abylaı», «Sáýkele» jáne taǵy da basqa pesalary respýblıkalyq jáne oblystyq teatrlarda sahnalanǵan. «Sonarda», «Ájem men emshi jáne dáriger», «Kimniń mekeni jaqsy?» atty áńgimeler men povester jınaǵy, «Japandaǵy jalǵyz úı» , «Aqan seri»  romandary jaryq kórgen. Kóptegen shyǵarmalary shet el tilderine aýdarylǵan. Qazaqstan Memlekettik syılyǵynyń ıegeri.