Elordada halyq jazýshylary Ábish Kekilbaev pen Farıza Ońǵarsynovanyń kórmeleri ashyldy
sp;ASTANA. Qarashanyń 24-i. QazAqparat /Marlan Jıembaı/ - Búgin elordadaǵy QR Ulttyq akademııalyq kitaphanasynda halyq jazýshylary Ábish Kekilbaevtyń «Álem ádebıetiniń aqtańgeri» jáne Farıza Ońǵarsynovanyń «Poezııa padıshasy» atty kórmeleriniń ashylý rásimi boldy,
dep habarlaıdy QazAqparat.
Sharanyń ashylý saltanatynda sóz sóılegen QR Ulttyq akademııalyq kitaphanasynyń dırektory Raqymjan Otarbaevtyń aıtýynsha, búgin ashylyp otyrǵan kórme qazaqtyń eki birdeı halyq jazýshysynyń 70 jyldyq mereıtoılaryna arnalǵan. Bir aıǵa sozylatyn kórme barysynda eki qalamgerdiń shyǵarmalary nasıhattalady. Qazirdiń ózinde elordanyń 50 mektebiniń oqýshylary men joǵary oqý oryndarynyń stýdentteri osy kórmeni tamashalaýǵa kezekke turǵan.
Ol ashylý rásimge arnaıy qatysqan F.Ońǵarsynovaǵa óz tilegin jetkize kelip, «Sizdiń poezııańyz ataqty Dospanbettiń, Shalkızdiń, qarǵa boıly Qaztýǵannyń, Mahambettiń úlken jalaýger, maıdanboz poezııasynyń jalǵasy», dep atap ótti. Sonymen qatar Á.Kekilbaevtyń depýtattyq qyzmetine baılanysty issaparda júrgendigin, kórmege ol kisiniń jary Klara apanyń kelgendigin aıta kelip, «Ábish aǵa «mogıkannyń sońǵy tuıaǵyndaı» qazaqtyń uly jazýshysy. Qazaq ádebıetine, álemdik ádebıetke «Úrker», «Eleń-alań», «Shyńyraý», «Kúı» sııaqty ǵajaıyp dúnıelerdi syılaǵan tulǵa, uly qalamger», dedi.
Kórmege eki qalamgerdiń jaryq kórgen kitaptary, memlekettik jáne qoǵamdyq qyzmetterine baılanysty buqaralyq aqparat quraldarynda jarııalanǵan materıaldar jáne fotoqujattar qoıylǵan.
