Elordada halyqaralyq taý-ken metallýrgııa kongresi ótip jatyr
ASTANA. KAZINFORM — Búgin Astanaǵa 20 elden taý-ken salasynyń mamandary men sarapshylar jınaldy.
15-i halyqaralyq taý-ken metallýrgııa kongresine Qazaqstannan bólek Aýstrııa, Ulybrıtanııa, Germanııa, Eýroodaq, Ispanııa, Kanada, Qytaı, Mońǵolııa, Reseı, Saýd Arabııasy, Túrkııa, Ózbekstan, Fınlıandııa, Frantsııa, Shveıtsarııa, Shvetsııa, Chılı, Japonııa, Tájikstan elinen ókilder qatysyp jatyr.
Aıtýly is-sharanyń aıasynda forým, kórme, «Altyn Gefest» salalyq baıqaýy, kómir forýmy, altyn óndirýshiler forýmy, zergerler kongresi, paneldik sessııalar, bos jumys oryndar jármeńkesi, b2b jáne g2b kezdesýler qatar ótip jatyr.
Kongress birneshe halyqaralyq sessııadan turady:
1) Halyqaralyq seriktestik Ulybrıtanııa jáne Qazaqstan: ekijaqty yntymaqtastyqtyń keısi;
2) Áleýettiń ashylýy — Shvetsııa jáne Qazaqstan: turaqty taý-ken óndirisi, tsıfrlyq sheshimder jáne jasyl transformatsııa;
3) Jańa tehnologııalar, tájirıbe jáne zamanaýı sheshimder — bári bireýinde: Qazaqstannyń taý-ken metallýrgııa salasyna arnalǵan Kanadadan eń úzdik usynystar;
4) CNMC jáne NFC ınvestıtsııalyq Road Show tanystyrylymy: Qazaqstan-Qytaı.
Sondaı-aq eki kún boıy ótetin halyqaralyq kongress barysynda 387 ekijaqty b2b kezdesýler josparlanyp otyr. Sonymen qatar álemdegi molıbden boıynsha № 1 Chılı kompanııasy Molymet-pen Qazaqstanda molıbden ónimderin óndirý týraly 4 memorandýmǵa qol qoıý kózdelip otyr.
Odan bólek «Evrazııalyq top» JShS men Ónerkásip jáne qurylys mınıstrligi Geologııa komıteti taraptary arasynda tsıfrlyq geologııalyq aqparatty berý týraly kelisimge qol qoıý saltanaty ótpek.
Halyqaralyq kórmege 12 elden 50 kompanııa óz ónimderin qoıǵan, onyń ishinde 35 qazaqstandyq kompanııa jáne 15 sheteldik kompanııa bar.
Aıta keteıik, bıyl naýryzda Úkimet basshysy Oljas Bektenov geologııalyq barlaý men jer qoınaýyn paıdalanýdy damytý jóninde keńes ótkizdi.
Eske salaıyq, jyl basynda Úkimettiń keńeıtilgen otyrysynda Memleket basshysy Qasym-Jomart Toqaev jer qoınaýyn paıdalanýda reforma esh kedergige qaramastan jalǵasýǵa tıis degen edi.