Elordada «Ǵylymı-tehnıkalyq saıasattyń baǵalaý ádisteri: tájirıbe almasý» atty konferentsııa ótýde
ASTANA. 26 mamyr. QazAqparat /Marlan Jıembaı/ - Búgin elordada eki kúndik «Ǵylymı-tehnıkalyq saıasattyń baǵalaý ádisteri: tájirıbe almasý» atty ǵylymı-tehnıkalyq jáne ınnovatsııalyq damýdy uıymdastyrýshylardyń halyqaralyq konferentsııasy bastaldy.
Atalǵan sharaǵa QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshev quttyqtaý joldady. Alqaly jıyn barysynda mınıstrdiń quttyqtaýyn onyń orynbasary Nurmuhambet Ábdibekov oqyp berdi.
Á.Isekeshevtiń quttyqtaýynda atalǵan óńiraralyq konferentsııanyń negizgi maqsaty ǵylym jáne ınnovatsııa salasyndaǵy yntymaqtastyqty keńeıtý boıynsha usynystardy qalyptastyrý jáne basymdyqtaryn anyqtaý, aldyńǵy qatarly tájirıbelermen almasý, yntymaqtastyqty shekteıtin faktorlar men kedergilerdi aıqyndaý, sondaı-aq saıası qoldaýdy qajet etetin problemalary kórsetý ekendigi aıtylǵan.
«Konferentsııa aldyna eksperttik baǵalaýǵa saraptama júrgizý, ǵylymı-tehnologııalyq damý mekemelerin baǵalaý, sondaı-aq Eýropalyq Odaq pen Shyǵys Eýropa men Ortalyq Azııa arasyndaǵy ǵylymı-tehnıkalyq yntymaqtastyq úshin «Aq kitap» túsinigin engizý syndy aýqymdy mindetterdi qoıyp otyr. Alqaly jıyn barysynda Shyǵys Eýropa men Ortalyq Azııa elderi úshin ilki baǵalaý is-sharalary úshin sharalar anyqtalatyn bolady», - delingen quttyqtaýda.
