Elordada gıd-ekskýrsovodtar men tárbıeshilerdiń úsh aılyq kýrsyn tegin oqýǵa bolady
ASTANA. QazAqparat - Elordanyń jumyspen qamtý ortalyǵy «Jastar» saraıynda jumys izdeýshilerge arnalǵan kezekti bos jumys oryndary jármeńkesin uıymdastyrdy, dep habarlaıdy qalalyq ákimdiktiń baspasóz qyzmeti.
Shara barysynda 60-tan astam jumys berýshi túrli mamandyqtar boıynsha bos jumys oryndaryn usynyp otyr. Saǵat 10.00-da bastalǵan jármeńke saǵat 13.00-ge deıin jalǵasty. Osy ýaqyt aralyǵynda jumys izdeýshiler áleýetti jumys berýshilermen suhbattasyp, usynylǵan bos oryndarmen tanysty, óz túıindemelerin qaldyrdy.
- Jármeńke azamattardyń barlyq sanattaryna arnalǵan. Búgin túrli salalarda myńǵa jýyq bos jumys orny usynylyp otyr. Bul joly qyzmet kórsetý salasyna basa nazar aýdarylady. Elordada jaqsy damyǵandyqtan munda kadrlar jetispeýshiligi baıqalady. Jalpy júrgizilgen monıtorıng qorytyndysy boıynsha bos jumys oryndarynyń arqasynda 300-den astam adam jumys tapqan, - deıdi Astana qalasynyń Jumyspen qamtý ortalyǵy baspasóz qyzmetiniń basshysy Dıdar Sadyqov.
Jármeńke barysynda gıd-ekskýrsovodtar men tárbıeshilerdiń úsh aılyq kýrstaryna da jazylýǵa múmkindik boldy. Oqý ortalyqtary ótkizetin kýrstardy Jumyspen qamtý ortalyǵymen uıymdastyrady, sabaqtar tegin ótkiziledi jáne stıpendııa tólenedi.
Bıyl jumyssyz azamattarǵa arnalǵan taǵy da eki jármeńke ótkizilmek.
- Menińshe, bul jumyssyz júrgen nemese qosymsha jumys izdegen adamdarǵa arnalǵan jaqsy shara. Jumys izdegenime kóp boldy, jármeńkege tárbıeshiniń jumysyn izdep keldim, - deıdi astanalyq Álıma Omarova.
Jalpy 1 qyrkúıektegi jaǵdaı boıynsha, qalalyq Jumyspen qamtý ortalyǵyna 9125 adam júgingen, 7382 adamǵa áleýmettik qoldaý sharalary kórsetildi, 5180 adam jumysqa ornalastyryldy. Atap aıtqanda, 486-sy «Jumyspen qamtý jol kartasy - 2020» baǵdarlamasy aıasynda jastar praktıkasyna jiberildi, 107 astanalyq áleýmettik jumys oryndaryna joldama aldy. Al 623-idaıyndaý, qaıta daıarlaý jne biliktilikti arttyrý kýrstaryn bitirdi.
