Elordada geroın satqan kúdikti áıelder ustaldy
NUR-SULTAN. QazAqparat – Elordanyń polıtseıleri arnaıy operatsııa júrgizip, onyń barysynda qala aýmaǵyna esirtki zattaryn jetkizý men ótkizý «arnasyn» joıdy, dep habarlaıdy QazAqparat tilshisi.
Nur-Sultan qalalyq polıtsııa departamentiniń málimetinshe, jedel-izdestirý is-sharalaryn ótkizý kezinde asa iri mólsherde esirtkini saqtaǵany úshin buryn esirtki qylmysy úshin sottalǵan 40 jastaǵy áıel ustaldy. Jeke tintý kezinde odan satýǵa daıyndalǵan «geroın» esirtki zatynyń 21 túıini tárkilendi.
«Esirtkiniń negizgi jetkizýshisin anyqtaý maqsatynda júrgizilgen jedel-izdestirý is-sharalary barysynda polıtseıler esirtki qylmysy úshin sottalǵan 32 jastaǵy kúdiktini ustady. Ol tórt gramnan astam «geroın» esirtki zatyn satqan. Atalǵan fakti boıynsha QR QK 297-baby 3-bóligi «esirtki zattardy, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý nemese ótkizý» boıynsha qylmystyq is qozǵaldy», - dep atap ótedi vedomstvodan.
