Elordada «Generaldar keńesiniń» mereıtoıy atalyp ótti
ASTANA. KAZINFORM — Astanada Qazaqstan Respýblıkasy «Generaldar keńesi» respýblıkalyq qoǵamdyq birlestiginiń 25 jyldyǵyna arnalǵan saltanatty is-shara ótti. Bul týraly Polisia.kz jazdy.
Mereıtoılyq jıyn taǵdyry Otanǵa qyzmet etýmen tyǵyz baılanysty ardagerlerdi, qyzmettegi qolbasshylar men eldiń kúshtik qurylymdarynyń basshylaryn bir alańǵa toǵystyrdy. Merekelik sharaǵa Qazaqstandaǵy qaýipsizdik pen quqyqtyq tártipti qamtamasyz etetin negizgi vedomstvolardyń ókilderi qatysty.
Atap aıtqanda Іshki ister mınıstrligi, Bas prokýratýra, Ulttyq qaýipsizdik komıteti, Memlekettik kúzet qyzmeti, Qarjylyq monıtorıng agenttigi, Qorǵanys mınıstrligi jáne Tótenshe jaǵdaılar mınıstrliginiń ókilderi boldy.
— «Generaldar keńesi» osydan shırek ǵasyr buryn áskerı jáne quqyq qorǵaý salasyna ǵumyryn arnaǵan azamattardyń tájirıbesin saqtaý ári ony keıingi býynǵa jetkizý maqsatynda qurylǵan. Osy ýaqyt ishinde uıym kishi ofıtserlik quramnan bastap joǵary áskerı shenderge deıingi joldan ótken qolbasshylardy biriktiretin bedeldi alańǵa aınaldy. Olardyń kásibıligi, strategııalyq oılaý qabileti men antqa adaldyǵy táýelsiz Qazaqstannyń nyǵaıýyna zor úles qosty, — delingen habarlamada.
Saltanatty bólim barysynda Qazaqstan Respýblıkasynyń Prezıdenti Qasym-Jomart Toqaevtyń quttyqtaý haty oqylyp, mereıtoılyq medaldar tabystaldy. Sonymen qatar kúshtik qurylymdardyń basshylary men ardagerleri sóz sóıledi.
Kontserttik baǵdarlamada ІІM, UQK, Qorǵanys mınıstrligi jáne TJM-niń shyǵarmashylyq ujymdary óner kórsetti. Ómirden ótken generaldardy eske alýǵa arnalǵan únsizdik mınýty kópshilikke erekshe áser syılady. 25 jyl — bul jaı ǵana uıymnyń mereıtoıy emes.
Bul — elge qyzmet etýdiń, tabandylyq pen kásibıliktiń shırek ǵasyrlyq tarıhy. Bul — ár kezeńde, ártúrli jaǵdaıda bir maqsat jolynda eńbek etken, eldi, halyqty jáne Qazaqstannyń bolashaǵyn qorǵaǵan azamattardyń shejiresi. Búginde olardyń tájirıbesi, bilimi men bedeli Qarýly kúshter men quqyq qorǵaý organdary sapynda qyzmet jolyn endi bastaǵan jas ofıtserler úshin mańyzdy baǵdar bolyp qala beredi.
Aıta keteıik, jaqynda 12 general dene daıyndyǵy boıynsha synaqtan súrinbeı ótti.
