Elordada Ǵazız Baıtasovtyń erligine arnalǵan fılmniń jabyq kórsetilimi ótti
ASTANA. KAZINFORM — QR Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen Sh. Aımanov atyndaǵy «Qazaqfılm» kınostýdııasy túsirgen «Kapıtan Baıtasov» kórkem fılmine arnalǵan jabyq kórsetilim uıymdastyryldy.
Týyndy 2011 jylǵy 12 qarashada Taraz qalasynda bolǵan qaıǵyly oqıǵalar kezinde erlikpen qaza tapqan polıtsııa kapıtany, «Halyq qaharmany» Ǵazız Baıtasovtyń erligine arnalǵan.
— Ulttyq kınostýdııanyń óndirisimen shyǵarylǵan fılm. Óskeleń urpaqqa bereri kóp. Urpaqqa qandaı da bir tulǵalardy pash etip kórsetý arqyly olarǵa ynta beretindeı deńgeıdegi fılm, — dedi Ulttyq kınony qoldaý memlekettik ortalyǵy basqarma tóraǵasynyń orynbasary Ádilet Omarov.
Onyń aıtýynsha, fılm elimizdegi quqyq qorǵaý organdarynyń mártebesin kóterip, kórermen yqylasyna qaraı kınoteatrlarda 1,5-2 aıǵa deıin kórsetilýi múmkin.
— Otbasymyz úshin úlken qaıǵy bolǵannan keıin, kishkene tolqý bar. Osy fılmniń túsirilim barysyna tolyqtaı atsalysyp, zerttep, rejısserlyq, prodıýserlik quramnyń arqasynda kınonyń shyǵýyna úles qostym dep aıta alamyn. Ákemniń rólin somdaǵan Azamat Satybaldy aǵamyz, menińshe, róldi 100 paıyz ashty dep oılaımyn, — dedi batyrdyń uly Ádiljan Baıtasov.
Ol bolashaqta ákesiniń jolyn jalǵastyryp, ishki ister organdarynda qyzmet etýdi maqsat etetinin aıtty.
— Kapıtan Baıtasov fılmi — erliktiń, adal qyzmettiń kórinisi. Týyndy arqyly osy salada aıanbaı eńbek etip júrgen batyrlardyń tulǵasyn dáriptep, elge qyzmet etýdiń ónegesin kórsetedi. Atalǵan fılm otanshyldyq pen adaldyqqa úndeıtin taǵylymy zor týyndy, — dedi Mádenıet jáne aqparat mınıstri Aıda Balaeva.
Kórsetilim barysynda Parlament Senatynyń tóraǵasy Máýlen Áshimbaevtyń quttyqtaý haty oqyldy. Onda Memleket basshysy Qasym-Jomart Toqaevtyń «er júrek saqshylardyń erligi halyq jadynda saqtalýy tıis» degen sózi keltirildi.
— Ǵazız Baıtasov óte batyr jigit edi. Óz ómirin qıyp, qanshama adamnyń ómirin aman alyp qaldy. Biz ondaı soǵysty kórgen memleket emespiz ǵoı. Ol kezde nebári 40 jasta bolatyn. Sol senbi áli esimde. Erte jumysqa jınalamyz. Kóshege shyǵyp ketken kezde, ratsııadan habarlady. Lańkestik bolǵanyn aldyn ala bilmegen edik, — dedi 2011 jyly Jambyl oblysy jol polıtsııasy jeke batalonynyń komandıri bolǵan Nurlan Qartybaev.
Akter Qobylandy Bolat bul fılmde Oljas atty keıipkerdi somdaǵan.
— Keıipkerim terrorızmge qarsy kúresetin laýazymdy azamattyń rólin somdaıdy. Osydan bir jyl buryn Almaty qalasynda túsirip bastadyq. Erekshe, kúrdeli, jumysy men daıyndyǵy kóp protsess boldy. Bul endi mıllıardtyq kassa jınaıtyn fılmderdiń qatarynan emes. Bul týyndy ósip kele jatqan urpaqqa elimizdiń qaharman azamaty bolǵan Ǵazız Baıtasovtyń erligin tanystyrady, — dedi óner ıesi.
Fılmniń rejısseri jáne stsenarıı avtory — Dáýren Qamshybaev. Basty rólderde Azamat Satybaldy, Erkebulan Daıyrov, Asan Májıt, Darhan Súleımenov, Qobylandy Bolat jáne Samal Eslıamova oınaıdy.
Aıta keteıik, buǵan deıin keýdesin oqqa tosqan batyr Ǵazız Baıtasov jaıly jazǵan bolatynbyz.
Kámılá Múlik