Elordada gaz taratý jelileriniń qurylysy bastaldy

NUR-SULTAN. QazAqparat - Nur-Sultan qalasy ákimdigi Tuńǵysh Prezıdenttiń «Bes áleýmettik bastamasy» aıasynda gaz taratý jelileriniń qurylysyn bastady. Bul týraly Ortalyq kommýnıkatsııalar qyzmetinde ótken brıfıngte qala ákiminiń orynbasary Ermek Qızatov aıtty, dep habarlaıdy QazAqparat tilshisi.

«Gazdandyrý jumysy eki baǵytta júzege asady. Birinshi baǵyt boıynsha qalalyq óndiris jáne turǵyn alaptaryn gazdandyrý jelisi salynady, ekinshisi - JEO-1 jáne JEO-2 jylý ortalyqtaryna gaz berý», - deıdi Ermek Qızatov.

Onyń aıtýynsha, qurylys jumystary 3 kezeńge bólingen.

«Birinshi kezeńde, ıaǵnı 2019-2020 jyldar aralyǵynda «Kóktal-1», «Kóktal-2», Jeleznodorojnyı, Ońtústik-Shyǵys turǵyn alaptary men Promyshlennyı kentine gaz tartylady. Bul jumystar kelesi jyly aıaqtalatynyna senimdimiz», - deıdi ákim orynbasary.

Onyń aıtýynsha, qurylystyń ekinshi kezeńi - 2020-2023 jyldar aralyǵynda júrgiziledi. Sonyń aıasynda Internatsıonalnyı, Kúıgenjar, Telman turǵyn aýdandary men Prıgorodnyı, Garden Village, Famili Village qalashyqtaryna gaz tartylady.

«Úshinshi kezeń 2020-2023 jyly júzege asyrylyp, Ilınka, Shubar, Óndiris aýdandaryna gaz qubyry tartylady», - deıdi ol.