Elordada ǵaryshkerlerge ǵylymı zertteý júrgizetin Ortalyq Azııadaǵy eń iri keshen ashyldy
«Space Nomad» jobasy ǵylymı zertteýlerge arnalǵan. Ol ǵaryshqa baratyn ǵaryshkerlerdiń daıyndyǵy úshin qajet. Keshenniń ishinde psıhologııalyq jáne fızıologııalyq ǵylymı zertteýler bolady. Máselen, Aıǵa nemese Marsqa ushý uzaq ýaqyt alady. Al osy uzaq ýaqytta tyǵyz bólmede bolý psıhologııalyq daıyndyqty qajet etedi. Bul keshen osy baǵyttaǵy zertteýlerdi júrgizýge múmkindik beredi», - dedi «Space Nomad» jobasynyń jetekshisi Rýstam Abdýrahmanov.
Onyń sózinshe, keshende ǵylymı zertteýler júrgizý búginnen bastaldy. Alǵashynda ekıpajdyń 3 múshesi bul ortalyqtyń jumysyn synap kóredi. Olar eki kún boıy elordadaǵy Ulttyq ǵarysh ortalyǵy ǵımaratynyń aýmaǵynda ornalasqan «Space Nomad» kesheninde bolady.
«Bul keshende ekıpaj músheleri qalaı tamaqtanady, ol ǵaryshkerlerdiń densaýlyǵyna qalaı áser etetini zertteledi. Alǵashyna olar eki kún keshennen shyqpaıdy. Keıingi ekıpaj músheleri 1 aı jáne odan da uzaq merzim bolady. Osy keshenniń ishinde tek qazaqstandyq mamandarmen ǵana emes, sonymen qosa kórshiles eldermen de birge zertteý júrgizý jospary bar. Atap aıtqanda, qazir biz Reseı tarapymen kelissóz júrgizip jatyrmyz. Odan keıin basqa da memleketterdiń ǵaryshkerleri jáne mamandarymen áriptestikte jumys isteýge nıettimiz», - dep málim etti Rýstam Abdýrahmanov.
Bul - ǵaryshkerlerdiń psıhologııalyq jaǵdaıyna zertteý júrgizýge múmkindik beretin Ortalyq Azııa aýmaǵyndaǵy eń iri keshen. Mamandardyń aıtýynsha, keshenniń ishi ǵarysh kemesiniń úlgisinde jasalǵan. Aldaǵy ýaqytty munda birneshe baǵytta zertteý júrgizý josparlanyp otyr.
