Elordada «Ǵarysh adamzattyń ıgiligi úshin - bolashaqqa kóz salý» atty taqyrypta halyqaralyq konferentsııa ótedi

Atalmysh sharany Ulttyq ǵarysh agenttigi Ulttyq ǵaryshtyq zertteýler men tehnologııalar ortalyǵymen jáne L. Gýmılev atyndaǵy Eýrazııa ulttyq ýnıversıtetimen birlesip uıymdastyrmaq. Konferentsııaǵa Qazaqstannyń, Reseıdiń, Frantsııanyń, Germanııanyń, Ýkraınanyń, Japonııanyń ulttyq ǵarysh agenttikteriniń, ǵarysh salasyndaǵy kásiporyndarynyń, konstrýktorlyq bıýrolarynyń, joǵary oqý oryndary men akademııalyq ınstıtýttarynyń jáne ǵylymı uıymynyń ókilderi qatysady. Sondaı-aq jıynǵa Parlament depýtattary, Prezıdent Ákimshiligi men Úkimet ókilderi, birqatar memlekettik organdar men «Nur Otan» partııasynyń ókilderi, sondaı-aq ǵaryshker Talǵat Musabaev pen onyń ekıpaj músheleri shaqyrylǵan.

Konferentsııanyń maqsaty - oǵan qatysýshy memleketterdiń ǵylym, bilim, óndiris, ǵarysh salasyna qatysty jáne ózge de baǵyttar boıynsha árekettesýdiń basym baǵyttaryn anyqtaý bolyp tabylady. Shara barysynda túrli ózekti taqyryptar boıynsha baıandamalar jasalady. Sondaı-aq «Ǵarysh qyzmeti salasyndaǵy halyqaralyq yntymaqtastyqty damytý» taqyrybynda dóńgelek ústel uıymdastyrylady dep josparlanyp otyr.

Konferentsııa jumysy «XXI ǵasyr zymyran-ǵaryshtyq tehnıkasy jáne ǵaryshtyq tehnologııa», «Ǵaryshtyq ǵylymı zertteýler jáne eksperımentter», «Ǵaryshtyq materıaltaný jáne aspap jasaý» atty taqyryptardaǵy úsh sektsııada ótedi.