Elordada Fýtbol kúni atalyp ótpek
ASTANA. QazAqparat - 24 mamyrda elordada Qajymuqan Muńaıtpasov atyndaǵy stadıonda Fýtbol kúni atalyp ótedi. Onyń aıasynda qala turǵyndary saǵat 12:00-de Astana qalasy men Qaraǵandy oblysynyń jeńimpaz quramalarynyń arasyndaǵy joldastyq kezdesýdi tamashalaı alady, dep habarlaıdy astana.kz.
Sharany uıymdastyrýshylar - elorda ákimdigi men Astana qalasynyń Fýtbol federatsııasy. Shara barysynda qazaqstandyq estrada juldyzdary óner kórsetip, túrli saıystar ótkiziledi, úzdik shyqqandarǵa syılyqtar beriledi. Sonymen qatar Qazaqstanda jasalǵan taýarlar jármeńkesi ótedi. Aıta keteıik, búgingi tańda Astana qalasynda eki kásibı fýtbol klýby: «Astana» jáne «Báıterek» FK bar. Olardyń negizinde jas fýtbolshylardy daıyndaıtyn eki balalar klýby ashyldy. Jalpy, qaladaǵy 10 áýesqoı komanda túrli jarystarǵa qatysady. Elordada shaǵyn fýtbol oınaýshylar sany da az emes. Astana qalasynda jabyq alańdarda oınaıtyn 90 kásibı emes qurama bar. Elordada balalar arasynda fýtboldy damytýǵa erekshe nazar aýdarylady. Astanada 1 mamyrda balalar fýtbol ortalyǵy ashyldy, onda 6-12 jas aralyǵyndaǵy balalar jattyǵady.
