Elordada frantsýzdyq áıgili «Taksı» fılmindegi avtokólik kóshirmesi kórmege qoıyldy
ASTANA. KAZINFORM — Búgin elorda tórinde ashylǵan «Automechanika Astana-2025» kórmesinde Frantsııanyń «Taksı» fılmindegi kýlt Peugeot 406 avtokóliginiń qoldan jasalǵan kóshirmesi jurt nazaryna usynyldy.
Fılmde Danıel esimdi keıipker Marsel kóshelerinde polıtsııadan qashyp qutylǵan osy kólikti endi Astanada kórýge bolady. Joba 1999 jylǵy model negizinde qaıta jasalǵan jáne tek syrtqy kelbetin ǵana emes, sonymen qatar aty ańyzǵa aınalǵan kınotýyndynyń rýhyn da jetkize alady.
Automechanika kórmesi — dástúrli kólik súıer qaýym men salanyń kásipqoılaryn biriktiredi. Bıyl erekshe nazar eksklıýzıvti avtokólikterge aýdaryldy. Olardyń qatarynda Qazaqstandaǵy jalǵyz Mitsuoka BUBU Classic SSK (Mercedes-Benz 1933 stılinde), jańǵyrtylǵan Ford Crown Victoria LTD, sondaı-aq «Forsaj» fılmindegi atyshýly Supra-nyń zamanaýı nusqasy jáne taǵy basqa kólikter bar.
Kórme alańy Germanııa, Italııa, Japonııa syndy elderdi qosqanda, 22 elden kelgen jetekshi óndirýshilerdi, dıstrıbıýtorlardy, servıstik kompanııa ókilderi men salalyq sarapshylardy biriktirdi.
— Búgin elordada Germanııa, Italııa, Japonııa sekildi 22 elden kelgen 350 kompanııa ókilderi avtomobıl ónerkásibi salasyndaǵy eń jańa tehnologııalar men sheshimderdi, ıdeıalardy tanystyrý úshin bas qosty, — dedi Ónerkásip jáne qurylys vıtse-mınıstri Oljas Saparbekov.
Onyń aıtýynsha, mashına jasaý, onyń ishinde avtokomponentter óndirisi men servıstik ınfraqurylym salalary — Qazaqstannyń ónerkásiptik saıasatynyń basym baǵyttarynyń biri. Kórme jergilikti óndiristiń damýyna jáne jahandyq jetkizý tizbekterine birigýge serpin beredi.
Aıta ketsek, elordada Ortalyq Azııadaǵy eń iri — «Automechanika Astana» halyqaralyq avtomobıl kórmesin ótkizý dástúrge aınalǵan.