Elordada fıtnes klýbtar men SPA salondardyń jumysyna tyıym salynady
NUR-SULTAN. QazAqparat - Elordada karantın aıaqtalǵanǵa deıin fıtnes klýb, SPA salon, kosmetıka kabınetteriniń jumys isteýine tyıym salynady. Bul týraly Nur-Sultan qalasynyń Bas memlekettik sanıtarlyq dárigeri Janna Pirálıevanyń qaýlysynda jazylǵan, dep habarlaıdy QazAqparat tilshisi.
Qaýlyda aıtylǵandaı, ulttyq qurama komandalaryn Olımpıadalyq jáne paralımpıadalyq oıyndarǵa daıarlaý úshin paıdalaný kezeńinde jumys isteýge ruqsat etiledi.
«Túngi klýbtardyń, fıtnes-klýbtar men zaldardyń, jattyǵý zaldarynyń, SPA-salondardyń, massaj kabınetteriniń, kosmetologı kabınetteriniń, klınıkalar men ortalyqtardyń, mektepten tys qosymsha bilim berý uıymdarynyń, kompıýterlik klýbtardyń, sport keshenderiniń qyzmetine tyıym salynady», - delingen qujatta.
