Elordada F. Shopenniń 200 jyldyǵyna arnalǵan kesh ótti
ASTANA. Qazannyń 28-i. QazAqparat /Jasulan Amanbaıuly/ - Astanadaǵy QR Tuńǵysh Prezıdentiniń murajaıynda polıak kompozıtory, pıanınoshy, ulttyq klassıkalyq mýzykanyń negizin salýshy Frıderık Shopenniń 200 jyldyq mereıtoıyna oraı «Shopenge arnaý» degen atpen mýzykalyq kesh ótti.
Mádenı is-shara barysynda birtýma kompozıtordyń týyndylaryn QR eńbek sińirgen mádenıet qaıratkeri, professor Nurlan Ismaıylov oryndady.
Sonymen qatar murajaı qabyrǵasynda Vılıanývadaǵy Plakattar murajaıy men Polsha Prezıdentiniń keńsesi «Frıderık Shopenniń izimen. Polıak plakaty» kórmesi ashylyp otyr. Murajaı dırektorynyń orynbasary Kúláısha Qabdýálıqyzynyń aıtýynsha, bunda 1932 jyldan bastap 2008 jylǵa deıin Shopen shyǵarmashylyǵyna arnalǵan festıvaldar men baıqaýlardan qalǵan 10-ǵa tarta tarıhı plakattar usynylǵan.
Jastaıynan mýzykaǵa áýes bolyp ósken F.Shopen 7 jasynda fortepıanoda oınaýdy cheh mýzykanty V.Jıvnyıdan, 12 jasynda kompozıtsııany polıak kompozıtory ıÝ.Elsnerden úırenip, tálim alǵan. 1929 jyly Varshava Joǵary mýzyka mektebin bitirgen. Jeti jasynda alǵashqy shyǵarmasy - fortepıanoǵa arnalǵan sol mınor polonezin shyǵarǵan onyń fortepıano men orkestrge arnalǵan 2 kontserti, 4 pesasy, 4 balladasy, 4 skertsosy, 4 ekspromty, 16 polonezi, 58 mazýrkasy, 17 valsi, 21 noktıýrni, 26 prelıýdııasy, 27 etıýdi, sondaı-aq kóptegen ánderi, rondolary, varıatsııalary jáne basqa da shyǵarmalary bar.
Kompozıtordyń shyǵarmalary polıak ulttyq mýzykasynyń zor jetistigine ári dúnıejúzilik mýzykalyq klassıkanyń úzdik úlgilerine jatady. Mýzykadaǵy realızmniń iri ókiline aınalǵan Shopenniń ómirsheń ári psıhologııalyq shyndyqqa negizdelgen tereń mazmundy týyndylarynda polıak halqynyń azattyq úshin kúresi men qaharmandyq ıdeıalary úlken sýretkerlikpen beınelengen.
F.Shopenniń shyǵarmalaryna arnalǵan kontsert elimizde alǵash ret 1923 jyly Almaty qalasynda mýzykalyq drama úıirmesiniń kúshimen uıymdastyrylǵan bolatyn. Sonan beri Qazaqstanda onyń áralýan mýzykalyq týyndylary oryndalyp keledi.
