Elordada estrada juldyzy Baǵdat Sámedınovanyń «Men dalanyń qyzymyn» atty kontserti ótedi

Osyǵan oraı búgin ánshi BAQ ókilderimen baspasóz máslıhatyn ótkizdi.

Elorda tórinde shyǵarmashylyq esep bermek bolyp otyrǵan ánshi buǵan deıin de qala jurtshylyǵyna Astana qalalyq fılarmonııasy halyq aspaptar orkestriniń súıemeldeýimen jeke kontsert bergendigin, basqa da mádenı sharalarǵa atsalysyp kele jatqandyǵyn atap ótti.

«Kontserttik baǵdarlamamdy daıyndaǵanyma birneshe jyl boldy. Jylyna eki kontsert berýden aýlaqpyn. Sebebi bul esep berý kontserti bolǵandyqtan, osy sharada birneshe jyldyq eńbegiń kórinýi qajet. Osy jolǵy kontserttik baǵdarlamamda ózimniń betke ustar ánime aınalǵan «Saryarqa» qaıta óńdelip, jańadan jazyldy. Sondaı-aq «Óz elim» ánin de aıtýǵa bolady. Jalpy oryndalatyn ánderdiń barlyǵy da jańa ánder. Kesh barysyna jańa kompozıtorlardyń, sonymen qatar meniń repertýarymda basty oryn alatyn halyq ánderi oryndalady», deıdi B.Sámedınova.

Onyń atap ótýinshe, oryndalatyn halyq ánderi qazaqılyq qaımaǵy buzylmaǵan Qytaı, Mońǵolııa elderinde turatyn qandastarymyzda saqtalǵan qazaqtyń halyq ánderinen iriktep alynǵan.

«Meniń repertýarymda patrıottyq ánder de jetkilikti. Kontserttiń atynyń ózi «Men dalanyń qyzymyn» dep patrıottyq sezimge, patrıottyq rýhqa tárbılep turǵan sııaqty. Men qazaqtyń dalasynda týǵanyma maqtanamyn. Maqtanyshpen, barymmen, bolmysymyn, qazaqtyń dalasyn, danalyǵyn, elimniń darhandyǵyn jyrlaýdan taımaımyn», degen ánshi kontsert barysynda shákirtteriniń, sonymen qatar ótinish bildirgen ánshi dostarynyń qatysatyndyǵyn atap ótti.