Elordada esirtkige táýeldi qansha adam esepte tur

ASTANA. KAZINFORM – Astana qalasynyń densaýlyq saqtaý basqarmasynyń málimeti boıynsha bıyl esirtki qoldanatyn 971 adam tirkelgen, onyń ishinde táýeldi jandar bólek esepke alynǵan. Bul týraly tolyǵyraq Astana qalasy ákiminiń orynbasary Eset Baıken aıtty.

- Elorda ákimi «Astana – esirtkisiz qala» atty 2023-2025 jyldarǵa arnalǵan jospardy bekitti. Onyń aıasynda esirtkimen kúreske baǵyttalǵan 92 is-shara qarastyrylǵan. Qalalyq densaýlyq saqtaý basqarmasynyń málimeti boıynsha, bıyl 971 esirtki qoldanatyn adam tirkelgen, bul ótken jylmen salystyrǵanda 1,2%-ǵa tómen. Sonymen qatar 279 adam esirtkige táýeldilikten arylǵan, ıaǵnı emdelgen jáne 70 esirtkige táýeldi jan esepke alyndy – dedi Eset Baıken qalalyq máslıhattyń jastar saıasatyna arnalǵan kezekti sessııasynda.

Ákim orynbasarynyń aıtýynsha, esirtkimen kúres baǵytynda qalada 40 aktsııa uıymdastyryldy.

- Profılaktıkalyq is-sharalarǵa úkimettik emes uıym ókilderi, máslıhat depýtattary, blogerler jáne quqyq qorǵaý organdarynyń mamandary qatysty. Sol sııaqty Zoom platformasynda kásibı psıhologtardyń qatysýymen onlaın trenıngter ótti, - deıdi ol.

Eske sala ketsek, taıaýda para alyp, esirtki saqtaǵan elorda ákimdiginiń qyzmetkeri aıyppul arqalaǵan edi.