Elordada esirtki jarnamasyna qarsy kúres kúsheıdi: alty qylmystyq is tirkeldi

ASTANA. KAZINFORM — Jyl basynan beri Astanada esirtki jarnamasy bar 200-den astam jazý anyqtalyp, osy derekter boıynsha alty qylmystyq is qozǵaldy. Polıtsııa zańsyz graffıtılerdi anyqtaý jáne olardy salǵan adamdardy jaýapqa tartý jumystaryn kúsheıtken.

Elordada esirtki jarnamasyna qarsy kúres kúsheıdi: alty qylmystyq is tirkeldi
Foto: Astana qalasynyń ákimdigi

Polıtsııanyń málimetinshe, jyl basynan beri elordada esirtki jarnamasy bar jazýlardy salýdyń 200-den astam deregi anyqtalǵan. Mundaı jazýlar kóbine turǵyn úılerdiń qasbetteri men qalalyq ınfraqurylym nysandarynda kezdesedi.

Árbir anyqtalǵan derek boıynsha qoldanystaǵy zańnamaǵa sáıkes sharalar qabyldanady. Polıtseıler esirtkini zańsyz jarnamalaýǵa qatysy bar adamdardy anyqtap, osyndaı quqyq buzýshylyqtardyń jolyn kesý jumystaryn júrgizip jatyr.

Elordada esirtki jarnamasyna qarsy kúres kúsheıdi: alty qylmystyq is tirkeldi
Foto: Astana qalasynyń ákimdigi

Budan bólek, jyl basynan beri Astanada ǵımarattardyń qasbetteri men qalalyq ınfraqurylym nysandaryna graffıtı salýdyń 800 deregi tirkelgen.

Qoǵamdyq oryndarda, turǵyn alaptarda jáne adam kóp shoǵyrlanatyn aýmaqtarda baqylaýǵa erekshe nazar aýdarylyp otyr. Zańsyz jazýlardy anyqtaý jáne olardyń jolyn kesý jumystary turaqty negizde jalǵaspaq.

Polıtsııa departamenti esirtki quraldarynyń jarnamasyn taratý, sondaı-aq bótenniń múlkin qasaqana búldirý Qazaqstan Respýblıkasynyń zańnamasyna sáıkes jaýapkershilikke ákep soǵatynyn eske salady.

Elordada esirtki jarnamasyna qarsy kúres kúsheıdi: alty qylmystyq is tirkeldi
Foto: Astana qalasynyń ákimdigi

Bul jumys quqyq buzýshylyqtardyń aldyn alýǵa, esirtki qylmysyna qarsy kúresýge jáne qoǵamdyq qaýipsizdikti qamtamasyz etýge baǵyttalǵan «Zań men tártip» qaǵıdaty aıasynda júrgizilip jatyr.

Elorda polıtsııasy turǵyndardy beıjaı qalmaı, esirtki jarnamasy bar jazýlar men ózge de quqyq buzýshylyqtar týraly 102 nómirine habarlaýǵa shaqyrady.