Elordada esirtki zerthanasyn uıymdastyrǵan úsh adam 10 jyldan astam merzimge sottaldy

ASTANA. KAZINFORM – Elordada esirtki zerthanasy anyqtaldy, dep habarlaıdy Astana qalalyq prokýratýrasynyń baspasóz qyzmeti.

Baspasóz qyzmetiniń málimetterine qaraǵanda, sotqa deıingi tergep-tekserý nátıjeleri boıynsha úsh adam sotqa berildi.

Tergeý barysynda málim bolǵanyndaı, sottalýshy temir konteınerdi jalǵa alǵan. Osydan keıin ol qala syrtynda quny 2 mln teńge bolatyn jer telimin satyp alyp, konteınerdi psıhotroptyq zattardy shyǵaratyn zerthana retinde jabdyqtap, ornalastyrǵan.

Kináli tulǵa qylmystyq áreketke eki sybaılasyn tartqan. Tergeý barysynda astyrtyn zerthanadan alynǵan 24 kg astam psıhotroptyq zattar joıyldy.

Nátıjesinde sot elordanyń úsh turǵynyn asa iri kólemde psıhotroptyq zattardyń analogyn satý maqsatynda zańsyz daıyndaǵany jáne saqtaǵany úshin kináli dep tanyp, 10 jyldan 11 jyl 3 aıǵa deıingi merzimge bas bostandyǵynan aıyrý jazasyna sottaldy.

Úkim zańdy kúshine endi.