Elordada Esil ózeniniń boıynda sý qorǵaý aımaqtary men jolaqtary belgilenedi
ASTANA. KAZINFORM — Astana qalasy Qoǵamdyq keńesiniń otyrysynda sý qorǵaý aımaqtaryn, beldeýlerin jáne olardy sharýashylyq paıdalaný rejımin belgileý týraly ákimdiktiń 2023 jylǵy qaýlysyna ózgeris engizý máselesi qaraldy.
— «Astana qalasynyń sý obektilerinde sý qorǵaý aımaqtaryn, beldeýlerin jáne olardy sharýashylyq paıdalaný rejımin belgileý týraly» ákimdiktiń 2023 jylǵy 20 qazandaǵy qaýlysyna ózgeris jáne tolyqtyrý engizý týraly» qaýlynyń jobasy usynylyp otyr. Joba QR Sý kodeksine, «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańyna, sondaı-aq QR Sý resýrstary jáne ırrıgatsııa mınıstriniń 2025 jylǵy 9 maýsymdaǵy buıryǵymen bekitilgen Sý qorǵaý aımaqtary men jolaqtarynyń shekaralaryn belgileý qaǵıdalaryna sáıkes ázirlendi. Atalǵan qaýlymen kelesi ózgerister engiziledi. Astana qalasyndaǵy golf-klýb aýdany aýmaǵynda ornalasqan 405 gektar jer ýchaskesi sheginde Esil ózeniniń eski arnasy boıynda sý qorǵaý aımaqtary men jolaqtary belgilenedi. Sý qorǵaý aımaǵynyń normatıvtik ólshemi — sý jıeginen 500 metr. Al sý qorǵaý jolaǵynyń normatıvtik ólshemi — 35 metr, — dedi qalalyq Qorshaǵan ortany qorǵaý jáne tabıǵatty paıdalaný basqarmasynyń basshysy Dáýlet Dosqulov.
Onyń aıtýynsha, atalǵan ýchaskede sý qorǵaý aımaqtary men beldeýleri osyǵan deıin belgilenbegen.
— Astana jańa nysandardyń qurylysy baǵytynda qarqyndy damyp kele jatqanyn eskersek, osy jaǵdaı sáýlet organdaryna tıisti jańa qurylystyń jobalaryn kelisýge qıyndatyp otyr. Osy oraıda atalǵan bastamany kóterip otyrmyz. Sonymen qatar, joba Astana qalasy ákimdigi janyndaǵy kásipkerlik máseleleri jónindegi saraptamalyq keńeste kelisildi. Barlyq múddeli memlekettik organdardan kelisim boldy. Bul joba Qazaqstan Respýblıkasynyń qoldanystaǵy zańnamasyna qaıshy kelmeıdi. Qoldaýlaryńyzdy suraımyn, — dedi basqarma basshysy.
Qoǵamdyq keńes otyrysynda osy jobaǵa qatysty qoldaý jasaldy.
Budan buryn habarlanǵandaı, elimizdiń barlyq sý obektisinde sý qorǵaý aımaqtary men beldeýlerin belgileý josparlanyp otyr.